تويت
اللحمه البارده او الرستو لعزومات رمضان مقدمة من نور الهدى وأحلى شيف صغير
اخواتى عضوات منتدى لك كل عام وانتم بألف خير ورمضان كريم وينعاد عالمسلمين أجمعين بخير ان شاء الله
حقدم لكم النهارده اللحمه البارده او الرستو بمساعده بنتى الكبيره نور الهدى
اعرفكم بنور الهدى
السن - 5 سنوات و 9 شهور
السنه الدراسيه - جريد 1 ان شاء الله
الهوايات - السباحه وعمل اشكال بعجينه الصلصال وايضاً التصوير بالكاميرا
الأمنيه - مدرسه فرنساوى فى المستقبل ان شاء الله
الأكلات المفضله - الجمبرى المقلى والملوخيه والدوناتس وعصير الموز بالحليب
ودى صوره نور الهدى فى أحدى الحفلات المدرسيه
كفايه كلام عن نور الهدى ونرجع لموضوعنا وهو
عرق التربيانكو
هو عباره عن عمود من اللحم زى اللى فى الصوره كده ولحمته بتبقى اشد من لحم الفلتو لان لحم الفلتو طرى جدا جدا جدا تقريبا اطرى قطعه فى العجل كله
المقادير
عرق وزن كيلو ونص تقريباً
بصل مقطع
جزر مقطع بالطول وجزره مقطعه قطع كبيره
توابل ملح وفلفل وجوزه الطيب وقرفه وحبهان ومستكه
فلفل اسمر حب
قطعه زبده ومعلقه زيت ذره
خيط عادى او دوباره
الطريقه
التربيانكو بنجيبه من الجزار احيانا الجزار بيحشيه ويربطه بالدوباره وبيقى جاهز للطهى لكن انا هنا جبته زى ماهو علشان تشوفوه
بننضف على قد ما نقدر طبقه الدهون اللى بتبقى حواليه ونغسله كويس
وبأى اله حاده رفيعه وممكن المقوار اللى بنحفر بيه الكوسه ندخله كده فى العرق ونلفه كأننا بنقور الكوسه علشان نوسع مكان للحشو
نقطع جزر شرايح بالطول وندخل الجزر فى الفتحه اللى عملناها ولو المقوار او الاله الحاده قصيره نعمل نفس الخطوه اللى فاتت الناحيه التانيه برده من قطعه اللحمه بحيث نقدر ندخل الجزر من الناحيتين
ونعمل شقوق بالسكين بالشكل ده فى قطعه التربيانكو
الشقوق اللى عملناها دى لكم مطلق الحريه فى ناس بتحب تحشيها توم صحيح انا شخصيا مبحبش طعم التوم فى اللحمه فبحط شرايح بصل مقطعاها صغير ومعاها فلفل اسمر حب واهو البصل واضح فى الشقوق
نلف العرق كويس بالدوباره وممكن خيط عادى متقلقوش مش حيحصل شئ ودى ايد بنتى نور الهدى على فكره علشان كانت بتساعدنى
ونعمل خلطه توابل بسيطه عباره عن ملح وفلفل وجوزه الطيب وقرفه بسيط ونتبل العرق من بره كده زى ما نور بتعمل
وفى صينيه تكون كبيره نسيح قطعه زبده ومعلقه زيت دره ومستكه وحبهان بالشكل ده
هنا فيه اهم خطوه اللى هى تحمير قطعه اللحم من كل الجوانب ليه؟؟؟؟؟؟؟؟؟ علشان نقفل المسام كلها وميتسربش السائل اللى جوه اللحمه وتبقى ناشفه وقاسيه لان لازم تبقى طريه فى الاكل وعلشان كده لازم نفضل واقفين جنبها ونحمرها من كل ناحيه وايدنا تبقى فيها منسبهاش خالص نفضل نقلب نقلب
ونقلب على كل الجهات
بعد عشر دقائق من التقليب ويبقى لونه بالشكل ده نضيف بصل وجزر وفيه ناس بتضيف اضافات تانيه كتير زى الطماطم والكرفس والبطاطس علشان بيعملوا الصوص بس انا ماليش فى الصوص خالص بحبه زى ماهو كده ولذلك انا ضفت جزر وبصل فقط للنكهه
وهنا شلته من الصنيه بعد ما اتحمر كويس من كل الجهات والمسام اتقفلت ممكن تخليه فى الصينيه وتضيفى ماء وتحطيه فى الفرن لمده ساعه وربع لكن انا بشيله من الصينيه وبحطه فى كيس حرارى فى الفرن
هنا فى الكيس الحرارى مع الجزر والبصل وزودت ملح وفلفل وضفت كمان اتنين كوب ماء وقفلت الكيس ودخلته الفرن درجه حراره 180 لمده ساعه وتلت تقريبا
ملحوظه
بعد ما يستوى فى الفرن نخرجه يبرد وبعدين نلفه فى فويل ونشيله فى التلاجه لان مينفعش اطلاقا اننا نقطعه وهو لسه دافئ لان كده السوائل الى جواه حتنزل لان اللحمه لسه مش متماسكه ولو نزلت السوايل يبقى حيكون ناشف جدا يعنى لو عندك عزومه اعمليه قبلها بيوم او يومين وممكن تعمليه وتشيليه فى الفريزر وهو ملفوف ومش
مقطوع ومكن يفعد فتره كبيره ووقت استخدامه طلعيه ولما
يفك قطعيه ولازم لازم بسكينه حاميه جدا جدا حتلاقيه اتقطع بسهوله وبيبقى بجد رائع رائع
هنا قطعناه وبنتى نور بدأت ترصه فى طبق علشان اشيله لتانى يوم لانى عملته لفطار اول يوم رمضان
وغلفت الطبق علشان اشيله لتانى يوم ولو مش حتستخدميه تانى يوم ممكن برده تقطعيه وتشيليه عالفريزر لحد ميعاد العزومه او للاستخدام العادى
وده شكله فى الطبق واعذرونى مكنش عندى وقت خالص ازين الطبق علشان كنت واقفه فى المطبخ والاذان قرب بس بنتى هى الى زوقته كده وصورته
وبكده انتهى الموضوع يارب يكون الشرح وافى وان شاء الله تجربوه ويعجبكم
استنوا رايحين فين
اتفضلوا هديه نور اشكال بسيطه من الصلصال هى محتفظه بيهم وحبت تهاديكم بيها يارب تعجبكم وتعجب طنط وعود
السلام عليكم ورحمه الله وبركاته
[
تعليق