الكسكسي بالحوت الليبي على طريقة أمي الحبيبه
سلامات يا حبوبات
العضوات والزوار
هدا موضوعي التاني في هالركن يعني تاني وصفه "إدا عجبتكم نبي تشجيع قوي منكم ودعاء لأمي "
بسم الله أبدأ
المقادير :
لكيلو كسكسي يعني ل8 أشخاص مثلا
1 كيلو كسكسي يابس متع الحوش "شغل البيت" أو الجاهز ما يفرقش /راس ثوم مقشر / سمكه متوسطه منظفه و مقطعه جرار "حلقات" / ليمه "ليمونه" / م ص فلفل أسود / 1 م ك كمون حوت "سمك" /1 م ك ملح / 3 م ك طماطم حكه"معجون طماطم جاهز" /نص م ص بزار "كركم" / ثلث ك زيت نباتي أو زيتون / اميه "ماء" ممكن لترين مبدئيا وبعدين يتبخر مع الطبخ / م ص بهارات / نص م ص قرنفل مطحون "مسمار" /م ك فلفل أحمر حار "نقلل الكميه للي مايحبش الحار" ..
Uploaded with ImageShack.us
بطاطا , وبدنجال"بدنجان" , وقرعه كوسه , وفلفل :: نقلوهم للزينه ومقبلات مع الكسكسي
الطريقه :
نغسل الكسكسي لو كان بيتي ونصفيه كويس ونجففه بوضعه في صونيه "طبق" كبيره .
ناخد طنجره ونحط فيها الزيت ونحط فيها نص كمية الثوم المهروس ونحرك لحد ما تصفر الثومه "في الصوره شويه طابت الثومه مننا زياده" وبعدها على طول نحط الطماطم ونشكشكه "نخليه يتسبك" بعد شويه نحط عليه الملح والفلفل الأحمر والبزار ونص كمية" الفلفل الأسود ، القرنفل ".. وبعد التحريك نصب الميه وخليها على النار تغلي .
ناخد باقي كمية الثومه المهروسه ونحطها على الحوت مع الكمون وعصير ليمه صغيره ونحركه ونخليه يتبل
بعد ما تغلي الطبيخه كويس وتبدأ تتختر يعني مش هلبا نخفف عليها النار ونلاحظ إنه الزيت بدي يطفح فوق نصفيه بملعقه كبيره ونحبب بيه الكسكسي اللي جف
وبعد ما نحبب الكسكسي نحطوه في الكسكاس متع نفس الطنجره ونرجعهم على النار لحد ما يبوخ الكسكسي وما يحتاجش بعد ما يبدأ يطلع منه البخار لأكثر من ربع ساعه ويطيب
وبعد ما يبدا البخار يطلع من الكسكسي نقيم الكسكاس ونشوف المرقه نلقاها خاتره "متسبكه" نحط فيها قطع الحوت ونرجع الكسكاس ونخليهم شويه لحد ما يطيب الحوت وما ياخدش وقت دقايق بس ..
يعني تمر الربع ساعه ونطفي النار ونحط الكسكسي في صونيه واسعه شويه ونحط عليه شويه كمون حوت وباقي القرنفل وشوييية ماء زهر و"هادي حسب الرغبه" ونصب عليه كميه من المرقه وهو سخون ونحرك
نزيد عليه من المرقه ونحرك لكن مش لدرجة يتبلل هلبا لا بس ياخد نكهة الحوت
نحطه في صحن التقديم ونسقيه بالمرقه ونزينه بقطع الحوت والمقليات وشرائح الليم والفلفل المقلي
وهدا شكله النهائي والطعم خيالي اممممم
وصحتين وعافيه علي قلوبكم
طبعا النقل مسموح مع دكر المصدر ودعوه صادقه لأمي بظهر الغيب بالشفاء من كل داء وطول العمر بصحه وعافيهأماااااااااانه
إدا عجبكم لا تحرموني الردود
رد مع الاستدلال
كتبت بواسطة اريناس
الروابط المفضلة