محشى كوسه .. محشى ورق عنب .. مشاركه لملف الحبيبه تغريد

**أم شادى** · 24-09-2009, 08:56 PM

أتمنى ان تكونوا جميعا بخير و صحه و سعاده

نحن جميعا نحب تناول المحشى بجميع أنواعه و يفضله الكبار و الصغار

فهو يتميز بطعمه الجميل و يعتبر و جبه كامله العناصر و سهل الاكل

و مشاركه لملف غاليتى تغريد للمحاشى بجميع انواعها أشاركم بمحشى الكوسه و البصل و محشى ورق العنب بطريقتى المعتاده

محشى الكوسه

المقادير

كوسه فى حجم واحد و طازجه
ربع كوب ارز مصرى مغسول و منقوع فى الماء
200 جرام لحمه مفرومه
بصله كبيره مفرومه
شبت و بقدونس مفرومين ( اى خضره تفضليها هذا ما تفضله اسرتى )
عصير طماطم أو صلصه ( أعملها بالصلصه غالبا )
ملعقه كبيره سمن
ملعقه زيت
ملح / فلفل
الطريقه

نكحت الكوسه كحت خفيف جدا ثم نحفرها بالمقوار ببطء و هدوء حتى لا تتكسر

نعد الحشو بخلط كل المقادير مع بعض ماعدا عصير الطماطم و تقلب جيدا

عند البدء فى الحشو نعمل عده شقوق صغيره فى الكوسه من اسفل و فى الوسط ببوز السكين
لاخراج الهواء منها وحتى لا تنكسر و نحن نضع الحشو بداخلها

نحشى كل الكوسه برفق فى الضغط عليها و نترك جزء بسيط فى طرفها فارغ
حتى لا تتفتح اثناء الطبخ و لاعطاء الارز مساحه ليتمدد

دائما يوجد عندى حشو فائض أفضل احشيه بصل لمذاقه المييز و لرغبه أسرتى
اقطع البصله من زيلها و اقشرها و أحفرها برفق و أعمل بها شق بالسكين تصبح شبه الخرشوف
و اضع الحشو بداخلها مع ترك الحافه فارغه

و أفضل حشو فلفل أيضا لرائحته الذكيه و طعمه المميز بنفس الطريقه حبه واحده او اثنين
اضع البصل فى وسط الصنيه و حوله الكوسه و الفلفل فى الصنيه

و عليهم عصير الطماطم او الصلصه المذابه فى ماء و الزيت و رشه ملح خفيفه حتى يغطى المحشى
( يمكن اضافه مكعب مرقه لمن يرغب )

و يترك حتى يغلى ثم نهدى النار حتى ينضج سنلاحظ ان الحشو بعد النضج أصبح لحافه الكوسه او اعلى قليلا

اول ما ينضج ارفعه من الصنيه و ارصه فى صنيه التقديم و اصب عليه الصوص ( لو سيقدم فورا )

ولو الكميه كبيره اقسمها فى صنيتين من البيركس حتى يكون شكلها جميل على المائده
و نضع صنيه فى كل جنب من المائده حتى يتمكن كل الضيوف من التناول

و لو عندك عزومه ممكن تعمليها كدا و تتركى الصوص يبرد
و تضعيه عليها و تحفظ فى البراد لتانى يوم العزومه على التسخين فقط

و يقدم دائما بجانب الارز الابيض و السلطات

أتمنى تكون عجبتكم طريقتى لانها خفيفه و جميله فى نفس الوقت

و نحن فى انتظار ورق العنب

**أم شادى** · 24-09-2009, 09:05 PM

من أجمل و أحب و أشهى الاطباق فى العزائم و الحفلات

محشى ورق العنب

المقادير

نصف كيلو ورق عنب طازج
2 كوب ارز مصرى مغسول و منقوع فى الماء
ربع كيلو لحمه مفرومه
3 بصل و سط ناعم
3 طماطم حمرا مكعبات صغيره
كوب و نصف من الشبت و البقدونس مفرومين
2 ملعقه صلصه
2 ملعقه سمن كبيره
2 ملعقه زيت
ملح / فلفل / جنزبيل بودر

الطريقه

نجهز الحشو بخلط الارز و اللحمه و البصل و الطماطم و الخضره و جزء من الصلصه و الملح و الفلفل و السمن و الزيت خلط جيد

نضع ورق العنب مجموعه مجموعه فى ماء مغلى حتى يصفر لونه نقلبه على الوجه الاخر حتى انتهاء الكميه

نشطفه بالماء البارد و نصفيه جيدا

نفرد الورقه و نزيل العنقود الصغير منها و نضع حوالى ملعقه من الحشو
حسب حجم الورقه و نتنى جناب الورقه و نلفها مثل الاصبع

و نكرر اللف فى كل ورقه حتى ننتهى من الكميه كلها و نجهز وعاء به حلقات من البصل و فوقها حلقات من الطماطم و رشه ملح و فلفل
نبدأ فى رص اصابع المحشى بالطول حولين الوعاء و نملىء الوسط
و هكذا حتى ننتهى من كميه المحشى كلها

و يمكن رصها باشكال مختلف و فى انيه مختلف و يكون الشكل مختلف ايضا عند التقديم

بناتى الحبيبات بعد الانتهاء من لف ورق العنب يمكن رصه فى طبق من الفوم و يغلف بالنايلون
او علبه محكمه والاحتفاظ به فى الفريزر مجمدا
و عند الحاجه يترك يفك من التجميد و يتبع باقى الخطوات

تذاب الصلصه فى قليل من الماء و توضع على المحشى بحيث لا تغطيه تماما
و نضع مكعب ماجى لمن يرغب و ( ممكن عصير ليمونه ) نضع طبق يتحمل الحراره فوقه

و يترك حتى يغلى ثم نهدى النار و يترك حتى ينضج و ممكن يأخذ ساعه من الزمن
يقلب فى طبق التقديم و يقدم و شكله بيكون مثل التورته حسب الوعاء الذى طبخ فيه

و نحن نحبه ساخن و بدون ليمون

و هذه فى و عاء اصغر

و هذه بطريقه رص مختلفه

أتمنى أكون وفقت فى الشرح و يكون عجبكم المحشى

أترككم فى رعايه الله و أمنه

لالالالالا تنسوا الدعاء لأولادى

**حنان(البحرين)** · 26-09-2009, 12:01 PM

**ليبيا قلبى** · 26-09-2009, 12:35 PM

**تغريد2007** · 26-09-2009, 01:06 PM

احلى مشاركه من احلى اخت غاليه على قلبي والله
الله يسعدك يا رب يا ام شادي ويفرحك بكل حبايبك ويخليلك اولادك وتسلميلهم يا رب
الف الف شكر حبيبتي على المحاشي الطيبه بارك الله بك

**فافيو** · 26-09-2009, 01:21 PM

ما شاء الله ولا قوة الا بالله
ايه الجمال ده
تسلم ايدك يا حلوة الحلوين
ربنا يحميكي من كل شر
ويديكي الصحة والعافية

**الجواهر الذهبية** · 26-09-2009, 06:48 PM

الله يوفقك انتي واولادك ولا يحرمك الاجر

**أم شادى** · 26-09-2009, 08:36 PM

كتبت بواسطة حنان(البحرين)

الف الف شكر حبيبه قلبى الغاليه
الاروع مرورك يا غاليه عطر صفحتى و شرف موضوعى
تسلميلى يا رب يا ست الكل ربنا يكرمك و يباركلك
مشكوره حبيبتى على التميز و على سعه صدرك
جزاكى الله الجنه و نعيمها و اطعمك من ثمارها
مرورك الكريم اسعدنى و شرفنى و نورنى

**monaahmedsaad** · 26-09-2009, 08:42 PM

ماشاء الله والله روووووووعة انا بعشق وبموووووووووووووووووت بالمحاشي بانواعها وشكلهم دول شهوني جدا

فانا هاخد كلهم اعملهم بكرة ممكن
بارك الله فيكي يارب والف هنا علي قلوبكم بارب