سلام للخبيرات في المطبخ......
مبارح كان عندي عزومة لأصحاب زوجي عالعشا و هاي أول عزومة محترمة بحياتي خصوصا انو أنا صارلي متزوجة سنة و نص بس
و كنت يعني ماشي حالي بالطبخ يعني بعرف أطبخ بس مو كل اشي الأكلات السهلة بس و بكميات قليلة بس الحمدلله بشكل عام زوجي من أول زواجنا كان يحب طبخي و يحكيلي انو أنا الي نفس حلوة عالأكل و أهلي كمان كانو يحكو هيك.
و طبعا كان الي تجارب فاشلة كتير و ما كنت أنوع بالأكل و كنت أخاف أعمل اشي جديد يعني كنت أطبخ بس الأكلات اللي بعرف أعملها منيح.
المهم من أسبوع زوجي حكالي انو بدو يعزم أصحابو حكيتلو أوكي على أساس
انهم بس اثنين حكيت بعمللهم طبق واحد مع سلطة و خلص
بعدين اجا زوجي حكالي انهم 7 أشخاصو حكالي انو أعمل كميات كبيرة لأنهم ماشاءالله بسحبو منيح بالأكل.
انا حسيت حالي تورطت و ما عرفت شو بدي أعملو ضليت خايفة و قبل العزومة بيوم ما نمت بالليل و ضليت قلقانة انو ما أعرف أزبط الأكل و زوجي الله يخليلي إياه يطمني و يحكيلي انو أنا بعرف أطبخ و انو كل شي رح يكون تمام.
المهم توكلت على الله و نظمت أموري و قررت انو أعمل ما يلي:
الأطباق الرئيسية
_كبسة اللحم
_دجاج مشوي بالأعشاب و التتبيلة كانت: زبادي, ليمون, خل, كاتشاب, باربكيو صوص, معجون الطماطم,صوص حار تاباسكو, ثوم, زنجبيل طازج, زعتر أخضر, زعتر مطحون اللي بناكله مع زيت زيتون,زيت ذرة, بهارات متنوعة, ملح.
المقبلات
_سلطة متنوعة: بندورة, خيار, خس, فلفل حلو أصفر و أخضر و أحمر, ملفوف أحمر,كزبرة, نعنع, بقدونس, ليمون
_سلطة معكرونة: معكرونة منحنيات مسلوقة, فاصوليا حمرا معلبة, ذرة معلبة, مايونيز, خل, ليمون, ثوم
_سلطة مشوية: فلفل حلو أخضر مشوي بالفرن و مقشر ثم مهروس بالشوكة, فلفل حار مشوي مقشر و مهروس, بصل مشوي و مقطع, ثوم مشوي, بندورة مشوية.
_بابا غنوج: باتنجان مشوي و مقشر و مهروس, بندورة مفرومة, بقدونس, نعنع مفروم, بصل أخضر مفروم, ليمون, ثوم, زيت زيتون.
_مخللات بأنواعها و زيتون أخضر و أسود
_ثومية تؤكل مع الدجاج: بطاطا مسلوقة, زبادي, طحينية, ثوم, ملح.
_صلصة الكبسة: بصل, ثوم,زنجبيل طازج, بندورة مقشرة ومفرومة, معجون الطماطم, بهارات كبسة, ماء. و يتم طبخها على النار حتى تصبح ثقيلة و متماسكة.
الأطباق الجانبية:
_شوربة خضار: بصل, ثوم, بصل أخضر, بطاطا, جزر, بازيللاء,كوسا, بندورة مفرومة, بقدونس.
الحلو:
_سلطة فواكة: ليمون, عسل, موز, تفاح, مانجا,فراولة,كيوي,دراق,خوخ,برتقال, قشطة
_كعكة باردة: طبقة بسكوت مشرب بالحليب, طبقة توفي, طبقة بسكوت مشرب بالحليب, طبقة كريما و قشطو و جبنة كيري و حليب مخلوطة بالخلاط.
و طبعا لا يخلو الأمر من مفاجئات غير سارة مثل إنو الرز عشان الكمية كانت كبيرة حوالي 3 كيلو ما استوى معي كلو و من فوق ما استوى و صرت بدي أبكي خصوصا انو قربو يوصلو الناس فرحت زدت عليه شوي ماء ساخن و حطيت كل الطنجرة بالفرن مدة ربع ساعة و الحمدلله استوى و طلع زابط عالأخر.
النتيجة النهائية انو كل الأكل كان طيب كتير و زابط و الجماعة أكلو كتير و ضلو يمدحو بطبخي و تقريبا أكلو من كل اشي الحمدلله و زوجي انبسط بس هلأ صار بدو يعمل عزايم كتير.
الروابط المفضلة