*موضوع متميز*طريقة حفظ البطاطس والقلقاس والسبانخ والطماطم بالتفصيل من مطبخ لولو حبيبى
السلام عليكم يا حلوات
طبعا لكل نوع من الخضروات والفاكهةأوان
واليومين دول فى حاجات كتير اوى ابتديت تخلص من السوق او ابتديت ترخص فلازم الست الشاطرة تنتهز الفرصة وتخزن للموسم الجاى الحاجات اللى مش هتلاقيها او هتغلى
وبما ان عجبكم طريقتى فى تخزين الكرنب
قولت اصور كل الحاجات اللى بفرزها بس اعزرونى
لو فى خطوات متصورتش لانى بجد مجهود جامد جدا وكنت بنسى اصور خطوة من الخطوات
بس ان شاء الله الشرح يبقى مفهوم
نبدا بسم الله
القلقاس والسلق
دة طبعا اول ما بنجيبة انا بغسلة من برة الاول وانشفة وبعدين اقشرة واقطعه مكعبات وانقعة فى ماية سخنة واعد اغسل فية
حوالى 20 مرة علشان المادة اللزجة اللى فية تتطلع منة واعد ادعك بايدى لحد الماية ما تبقى شفافة مش بيضاء
ودة شكلة بعد التقطيع ولما غسلتة كام غسلة بس للاسف مصورتش نسيت
وهنا الماية هتشوفوا بتبتدى تبقى شفافة
وهنا لما الماية نضفت خالص طبعا كل دة بماية ساخنة علشان تساعد
وهنا لما سيبتة يتصفى علشان احطة فى اكياس وعلى الفريزر
ودة شكلة بعد ما حطيتة فى الاكياس ماشاء الله لاقوة الا بالله
وطبعا منستش السلق ابداااااااااا
جبت طبعا سلق على اد الكمية اللى انا عايزاها
وغسلتة كويس جدا وصفيتة وقطعت الورق بس مش العروق
نسيت اصورها
وبحطها فى طاسة على النار الى ان الماية تنشف
وبحط ثوم على بكمية تناسب كمية السلق
يعنى انا حطيت على 3 حزم حوالى معلقتين كبار وكسبرة خضرة وسيبتهم ينشفوا خالص بس مع التقليب وبعد ما نشفوا ولونهم اغمق
حطيتهم مع حبة صغيرين جدا شوربة فى الخلاط وضربتهم وحطيتهم فى كيس
بس لما يطلعوا مش هنحتاج الا الشوربة وكلة هيبقى جاهز ان شاء الله
ونحط القلقاس والسلق اللى يناسب الكمية اللى هنستخدمها
ودة شكل السلق بس قبل ما افرزه
نيجى بقى للبطاطس
انا جبت كمية كويسة لانها رخيصة طبعا اليومين دول ولازم نوفر
ولا اية ؟
بغلى ماية على اد الكمية اللى هحطها فى الكيس وبعد ما اغسلة وقطعها واغسلها تانى طبعا بقطعها صوابع واغسلها تانى زيادة تاكيد
واحط على الماية المغلية فنجان خل واحط البطاطس واسيبهم يغلوا غلوتين
وبعدين اطلع البطاطس تتصفى كويس اوى اوى خطوة مهمة
وبعدين احطها بالاكياس وعلى الفريزر
ودة شكلها بس بعد ما اتفرزت ماشاء الله
عملت منها تانى يوم احلى من الجاهزة الف مرة
جينة للطماطم
انا بجيب كمية لانها رخيصة الكيلو ونصف بجنية
بس خدوا بالكم اشتروا بسرعة لانها مجنونةبتغلى بسرعة
بجيبها اغسلها واقطعها واخلطها فى الخلاط وبعدين اصفيها واحطها على النار بتبقى كمية كبيرة تخس للنصف بكدة بتبقى تقلت واسيب كل الماية تنشف واسيبها تبرد وبعدين احطها فى اكياس وعلى الفريزر
بيتعمل بيها كل حاجة اى نوع خضار او محشى او اى حاجة بالصلصة بتبقى جميلة
نيجى للبسلة
نفصصها ونغسلها ونغسل الجزر ونقطعه
ونغلى ماية ونحطهم فى الماية المغلية ياخد غلوتين
ونحضر قدر كبير فية ماية بثلج
ونطلعهم من الماء الساخن على البارد على طول ونسيبها شوية وتتصفة وتتشال فى كياس فى الفريزر تطلع متاخدش وقت خالص فى السوا
هنا بعد متفرزت بيومين
جينا للسبانخ
نغسلها كويس جدا وتتقطع قطع صغيرة ومعها كسبرة خضرا وشبت
ويتغسلوا كويس اوى
ويتصفوا كويس ويتحطوا باكياس وعلى الفريزر
وهنا بعد ما اتفرزوا بيومين
وكدة خلاص بس لو فرزت اى حاجة تانى قبل ما يخلص اونها ابقى انزلها ان شاء الله
واى سؤال او استفسار انا فى الخدمة
يا رب يكون شغلى عجبكم
رد مع الاستدلال
الروابط المفضلة