*طبق متميز* النجرسكو من مطبخ ام ملك بالصور اتفضلو معانا
السلام عليكم ورحمه الله وبركاته
النهارده هقدملكم النجرسكو
الاكله دي انا بحبها قوي وبعتبرها تغيير عن المكرونه بالبشاميل التقليديه والحمد لله دايما بتعجب كل اللي اكلوها
المقادير
كيس مكرونه قلم
دجاجه مسلوقه
1.5 كيلو لبن
9 ملاعق دقيق
مكعب ماجي
ملح وفلفل
رشه جبنه موتزاريلا
الطريقه
نسلق المكرونه الى تمام النضج
نعمل البشاميل انا بغلي اللبن وبضيف عليه مكعب الماجي واول ما يغلي اكون مفككه الدقيق في كوب حليب بارد واضيفه مع التقليب السريع بمضرب السلك على النار واضيف الملح والفلفل ويقلب الى ان يغلظ القوام احنا بنحبه ثقيل ويكون بالشكل ده
انا شخصيا مسلقتش فرخه كان عندي بواقي فراخ حطيتها في ميه وسبتها تغلي غلى النار علشان تبقى مهريه وطلعتها من الميه وفصصتها شرايح رفيعه باليد بالشكل ده
انا عاده بعمل البشاميل في حله كبيره لان في النجرسكو بنخلط المكرونه على الفراخ على البشاميل ونقلبهم مع بعض بس للاسف انا نسيت اصور الخطوه دي
وبعد كده برش الصينيه بالبقسماط ونصب الخليط في الصينيه بالشكل ده
ونكون مسخنين الفرن ونحط الصينيه ونقفل الفرن لمده ساعه تقريبا وبعد كده نحط الجبنه الموتزاريلا ونفتح الشوايه لمده 10 دقايق وبعد كده نطفي عليها ونخرجها من الفرن وتكون بالشكل ده
والحمد لله بيطلع طعمها تحفه وزوجي واخواتي وجيراني بيموتو فيها
ايه رايكم؟
رد مع الاستدلال
الروابط المفضلة