حبيت اقولكم على أسهل و أسرع طريقة للبشاميل,المهلبية,الرزباللبن و طبعا انا مجرباهم بنفسى و اللهى, طبعا احنا مشكلتنا مع الاكات دى انها بتاخد وقت طويل على النار و نقعد نقلب نقلب لغاية ما ايدينا تتهرى و ممكن كمان الدقيق و النشا يكلكعوا و يتجمدوا و حاجات من دى لكن بطريقتى ان شاء الله تكون اسهل و اسرع و للامانة انا اتعلمتها من ماما و خالتى ربنا يخليهم و يديهم الصحة يا رب

البشاميل
انا عن نفسى بحب البشاميل السايح اللى بيخلى المكرونة زى اللزانيا و اللى بتحبه تقيل يبقى تزود كمية الدقيق حوالى معلقتين او تلاتة

تغلى لتر لبن حليب يعنى تقريبا 4 اكواب و نحط عليه معلقتين زبدة و ملح و فلفل حسب الرغبة و اثناء ما هو على النار تضربى فى الخلاط 5 ملاعق كبيرة دقيق مع نص كوب ماء او لبن و اول ما اللبن اللى على النار يغلى نوطى النار و نصب عليه اللى فى الخلاط بالراحة مع التقليب و فى اقل من 3 دقايق هيكون جاهز معاكى اسهل و اسرع صلصة بشاميل ان شاء الله


الرز باللبن المصرى اللذيذ

الكمية دى طبعا ممكن تضاعفيها حسب افراد اسرتك
تنعى كوب صغير ارز فى كوب لبن لمدة ساعتين ده طبعا بعد ما تكونى غسلتى الرز كويس اوى
و بعدين تحطى الرز فى حله و معاه كوب لبن على نار هادية لغاية مايستوى الرز و بعدين تضيفى عليه لتر لبن حليب و كوب كبير سكر و نص معلقة صغيرة فانيليا و اثناء ما هما على النار تضربى فى الخلاط 4 ملاعق كبيرة نشا مع ربع كوب ماء او لبن و اول ما اللبن اللى على النار يغلى توطى النار و تصبى اللى فى الخلاط بالراحة و تقلبى و فى اقل من 3 دقايق هيكون جاهز معاكى اسهل و اسرع رز باللبن ان شاء الله و طبعا تحطيه فى اطباق او كبايات و تسيبيه يبرد شوية و بعدين تدخليه التلاجة


المهلبية

المهلبية هى نفس طريقة و مقادير الرز باللبن بس من غير رز
و ممكن تزودى معاها معلقتين كبار كاكاو سادة المر و تبقى مهلبية شوكولاته تحفة الاطفال هيحبوها اوى ان شاء الله

ملاحظات

ممكن بدل اللبن الحليب تستخدمى لبن بودرة فى الوصفات دى كلها انا بستخدم معلقة كبيرة لكل كوب ماء يعنى 4 ملاعق للتر
بضرب النيدو مع الماء كمان فى الخلاط عشان يدوب كويس
و فى مهلبية الشيكولاته بضرب معاهم كمان الكاكاو فى الخلاط
الاسرع بقى لو عندك غلاية الماء الكهربائية
يبقى هتسخنى الماء و تحطيه على النار و تاخديه شوية صغيرين تضربيهم فى الخلاط مع الدقيق ... النيدو ... النشا ... الكاكاو حسب كل وصفة


لو جربتو وصفات و نجحت ادعولى و ردوا عليا و رمضان كريم

يســــــــــــــــــــــــلمو ازميرالدا على الطرق السهلة
واكيد اكيد رح اجربهم

تسلمين أختي.انا دايما اشتري البشاميل الجاهز.ولكن هالمره حجرب طريقتك وان شاء الله تضبط معاي

لذيييييييييييييييييييييييييذة

تسلمى يدك

شكرا جزيلا نصائحك في مكانها

تسلمي حبيبتي

تسلمي...وشاكرين جدا على الطرق السهله والمضمونه...خصوصا البشاميل....واشكري لينا ماما وخالتو

شكرا وخصوصا لفكرة مهلبية الكاكاو راح اعملها لاولادي

تسلم الايادي عزيزتي طرق سهله وسريعه

شكرا ليكو على الاهتمام و الرد بس اتمنى لما تجربوا فعلا تقولى ان شاء الله