الي اخواتي الليبيات ......ارجو الاجابة

السلام عليكم انا عضوة جديدة بس اتمني انكم تقبلوني معاكم الي اخواتي الليبيات لي فيكم تعرف طريقة العصبان اليابس وفي من يسميه الواوي تقولي علي الطريقة علي خاطر اني حامل وخاطري فيه لن خلاص ارجوكم ما تبخلوش عليا في الرد صديقتكم الجديدة وشكرا سلف

يامرحبا بك حبيبتي معانا في منتدانا الجميل اليك حبيبتي طريقة العصبان اليابس يحضر من كتل أحشاء الشاة بعد غسلها مثل الامعاء الغليظة والدقيقة والمعدة (الكرشه) والشحم المحيط بالمعدة المعروف (بالرداء) وكذلك الرئه والكبد والقلب حيث تقطع مكونات المعلاق والمعدة الى قطع وتخلط بالابزار المكونة من (الملح والفلفل والكركم والزيت) ثم يلف قطعة من الكبد والرئه والشحم في قطعة من الكرشة (المعدة) وتربط من الخارج بواسطة قطعة من الامعاء الدقيقة تسمى مصران الى أن تنتهى الكمية ثم تعلق في حبل مثل القديد وتجف في الشمس والهواء الطلق وبعد ذلك تقلى في الزيت وتحفظ في آنية خاصة وتستعمل في عملية الطبخ ومن أشهر الاكلات المستخدمة فيها هي الرشدة والمكرونه المبكبكة والمحمصة وتوكل كذلك مع الكسكسى مقددة وطرية وتعرف بالعصبان اليابس.

وهذا رابط ملف للأكلات الليبيه فيه طريقة العصبان الطازج

ملف شامل للأكلات الليبية وبالصور

ان شاءالله اكون افدتك عزيزتي

صحيتي حبيبتي والله ليا اكتر من شهر وانا ندور في النت وما لقيتاش وانشاءالله نديره ونبعتلك منه ههههههههههه وقوليلي انتي ليبية علي فكرة انا في العمارة لي ساكنة فاها ما يبوش نديرو اي حاجة في البالكونة كان تعرفي طريقة تانية غير النشر علي الحبل قوليلي عليها وصحيتي وبارك الله فيك وانشاءالله ندرهولك في الفرح يارب وعندك صغار ولا لا

لا والله حبيبتي انا بحرينيه بس لي صديقه ليبيه وأحب الشعب الليبي وهذه الطريقه اخذتها من النت لك وحاضره لك عزيزتي في أي سؤال وياهلا بك نورتي المنتدى

حبيبتي بحرينة ليبية كلنا خوات وانشاءالله علي طول وعساك علي القوة والله بموت في اهل الخليج وايد وايد وانا حامل في تؤام وهدا اول حمل لي وانشاءالله الله يستر لاني كنت في المستشفي ويقولولي واحد من التؤام نبضه ضعيف بس ادعيلي الله يكملي حملي علي خير والله يستر

السلام عليكم ورحمة الله وبركاته

كيف حالك يوخيتي
وان شاء الله ربي يسهلك وتنوضي لي زوجك وان شاء الله يقدرني ربي علي مساعدنك

والله اني ننشر فيه بس تعرفي مره جربتها في الكوشه هو مطلعش زي الي تنشريه في شميس بس والله طعمتها مقبولا وحتي زوجي قالي قنين خير من بلاش ههههههههه

هادي طريقت امي الله يخليها

خودي هبرت لحم وكبد ورئيه كانك متشويه شلحيها رقيقها

وخودي كرشه حتي هي اغسليها وقصيها مربعات والمصرين رقيقات ورداء وحتي شحم حلو حتي هم اغسليهم

وبعتالي بهريها في شويه بزار وفلفل احمر وتوم مهروش وملح صبي مهو شويه وشويه زيت متصبيش ميا وخليها يتبل علااقل خليهم يوم كامل مش يمتصوا البهارات وبعتالي انشريهم كان في وين تنشريه وكان هاد افتحي الكوشه وحطي طاجين كبير من لوطها ودير شبكات امتع الكوشه من الوسط وانشري الحيمات والكبيده وخليهم وانسيهم يعني 4 او5 ساعات اني نفتح عليهم صبح كلها وبعتالي نطفي عليه ونفتح يوم تاني لي يخلي في ريحت الحواش قويه علي اخر هو فايح الحوش بش ريحت ماكلها هههههههه وبعد مايبس خودي يحنها كانك انشرتيه خودي اغلسليهم وبعتالي اقلي كان تبي قديد بس وكانك تبي عصبان خودي لحم والكبده والريئه قصيها مستطيل طويل وخودي كرشه بعد يبست افتحيه بيدك ولي الحيمات والكبده والريئه ديريهم في صونيه وحطيلهم بهارت وتعرفي اني عزوزتي تحط في شويه حبق وزعتر وتوم ونعانع مقرض صغير وتخلطهم مع بهارات كلهم وتبد تحشي في الكرشه وبعتالي تربطتيها بحبل المصران وتعودي تنشريهم علي اقل يومين مش شمس تضربهم وبعتالي مصمصيه وصفيها وبعدهااقليهم وزيت متبزعيشها صبيه فوق القديد اوالعصبان الايبس

وكان في الكوشه ردبالك تغسليهم لنهم كان غسلتيهم بيولي رطبين لنها مش شمس لي يبستهم حرارت الكوشه ونتمن اني وصلتلك المعلومه وهاد قديد درتها في نيوزيلند والله كان تعطيني عنونك لا يكون عندك القديد

يارب ينال اعجابك واي سوال تفطلي

الله يقومك بالسلامه حبيبتي وتبشرينا ويحفظك من كل شر

يا مرحب بالغالية
انا وخيتك الفالحة طرابلسية اباً عن جد ومازال قعدة في طرابلس ...
حبيبتي الطريقة يلي اعطتهالك حنان البحرين الله يجزيها خير مزبوطة بس ناقصة حاجة مهمة ... تعالي نقولك عليها ...
العصبان اليابس
يحضر من بطن الشاة ( ألدوارة ) بعد غسلها من الفرت وتاخدي الكرشة والرداء وعين الدوارة والمصارين ارقاق وشحم اللية والرئه والكبد والقلب ولحم هبرة تشلحيهم وترشيهم بملح وتنشريهم على حبل في الشمس ومرات مش لازم شمس مباشرة المهم مكان فيه مجرى ريح ( يعني تيار وسخون )
وبعد ما يجفوا وهذة النقطة يلي نستها حنان ... قطعي المعلاق ولحمة الهبرة يلي نشرتية الى قطع متساوية طولية بحجم الصوابع وتخلط بالبهارات ( بزار ، الملح ، فلفل أحمر، نعناع يابس ، الزيت وشوية خل - حسب الرغبة -وراسين كبار ثومة مهروشة)
نزلي البطن والمصارين بعد ما جفوا من على الحبل وخذي الكرشة والمصارين ونقعيها في ماء حتى ترتخي وتصير رطبة وقطعيها طروف بحجم الكف وخودي من خلطة اللحم والمعلاق والشحمة المبهرة وضعيها في الكرشة ولفي قطعة الكرشة عليهم ( اعملي شق بالسكين علشان يدخل فيها المصران ومعادش ينحل ) وتربط من الخارج بقطعة مصران المنقوع في المية وصار رطب وسها الستعمال... وهكذا الى أن تنتهى الكمية ثم تعلق في حبل مثل القديد وتجف في الشمس والهواء الطلق لمدة ساعات ( نص نهار ) وبعد ذلك تقلى في الزيت ما تخلهاش تنحرق ( شوفي اطراف العصبانه يعني لو الشحمة ولت صفراء دهبية يعني طابت )
تحفظ في آنية خاصة وتستعمل في عملية الطبخ وخاصة قاصة ... الرشدة والمكرونه المبكبكة والمحمصة والدشيشة
أحسن حاجة للنافس ( دحية بالكمون ) لو تبها قوليلي نعطيك الطريقة
ربي يقومك بالسلامة ... وتشوفي صغويرتك في احسن حال وربي يفرحك بهم
وعقبالي ياربي ( نموت في التوامة ... ادعيلي ...)

ليبية مغتربة ربي ينوضك بالسلامة ويفرحك بعويلتك وراك تنسيني في اللمة ههههههههههههههههههه اما عن اللواوي فهى كماذكرت الاخت الفالحة بالضبط الله يعطيها الصحة اجادت في الوصف وكذلك الاخت حنان مشكورة اما الاخت جبالية فاعطيها الف صحة علي حبال هالقديد فكرتني بالعيد في ليبيا اما عن تجفيف العصبان ومحتوياته اولا فما امامك الا الكوشة او الدفاية وطي النار امتاع الكوشة وحطيهن فيها وخلي عينك منهن لينحرقن او لو عندك منشر اللي يتعلق عالدفاية فيمكنك استخدامه بس راك اتخليه اينزل الدهان امتاعه عالارض وفهمك كفاية
وسلامتك الف سلامة انت والتوامة وانشالله نسمعو عليك الاخبار الطيبة

حبيبتي جبالية صحيتي يوخيتي وانشاءالله ربي يخليللك اميمتك والله فاقدة اميمتي في هالغربة وبالدات لما نبجيب ومامعاي ولا واحد من اهلي وانشاءالله ربي يخلي كل الامهات وسامحيني كيف رديت عليك علي خاطر كيف نايضة من النوم وصحيتي وانشاءالله نردهولك في فرح صغيويرتك يارب وانشاءالله انتم ياوخياتي تكونوا اهلي في المنتدي يارب والله ماليا غيركم وانشاءالله نكونو خوات يارب