مندي الدجاج + مندي اللحم

السلام عليكم ورحمة الله وبركاته
كيفكم يا بنات
اليوم حبيت أشارككم بطريقة المندي اللي اسويها و ان شاء الله تعجبكم

المندي بالدجاج
تجيبي الدجاجة بحبتها و تغسليها كويس
و بعدين تحطي عليها البهارات ( ملح فلفل أسود قرفة و أهم شي هرد=كركم و شطة حمرة بودرة)
تكوني ناقعة الأرز قبلها بساعة تقريبا
تصفي الأرز من مويته و تحمري بصلة صغيييييييييرة بس لا تخليها مرة حمرة يعني بس تذبل و حطي الرز عليها و حمصي شوي و آخر شي حطي حبة طماطم صغييييييييييييييرة مقطعة و قلبي شوي
دحين ضعي الأرز في صينية و ضعي عليه ماء ساخن طبعا لا تنسي انك ناقعته فحطي موية أقل من العادة يعني مثلا لو كنت مسوية كاستين رز حطي كاسة موية حارة
و غطي الصينية بالقصدير و اعملي فتحات في القصدير فتحات صغيرة وموزعة على الصينية
دحين حطي الدجاجة اللي بهرناها فوق القصدير
و غطي الدجاجة مع الصينية بقصديرة كبيرة
و دخليه الفرن لمدة ساعة أو أكثر
بعد ما يستوي تكوني ولعتي فحمة
سوي قصديرة صغيرة على شكل زبدية و حطي فيها زيت و فص مستكة
بعدين فكي القصديرة الكبيرة شوية و حطي الزبدية فوق القصديرة اللي غطينابها الأرز و اللي عملنا فيها الفتحات
و ارمي الفحمة جوة الزبدية و قفلي القصديرة الكبيرة بسرعة
خليه شوية يتبخر
و عند التقديم عادي حطي الأرزو فوقه الدجاج و بالهناء و العافية


مندي اللحم
و يصلح كمان بالدجاج
تحطي زبدة أو سمن في القدر و حطي معاه فص أو اتنين مستكة
حطي اللحم يتحمر شوي و بعدين حطي عليه موية حارة و كم فص هيل و فلفل أسود غير مطحون و حبتين قرنفل و خليها تغلي لين تستوي اللحمة
في هذه الأثناء حطي في كوب شوية هيل مطحون و ملح ليمون و زعفران مطحون و صبغة زعفران و حطي عليهم موية حارة كده نصف الكوب و خليهم ينقعو لين ما تستوي اللحمه
بعد ما تستوي اللحمة حطيها في صينية و رشي عليها من الموية اللي في الكوب اللي نقعناها و دخليها الفرن
في هذه الأثناء تكوني مغسلة الأرز و تحطيه على موية اللحمة لين يستوي
بعد ما يستوي الرز طلعي اللحم من الفرن و رصيه على الأرز في القدر و رشي من المرقة اللي في الصينية على و جه الرز و بخري القدر بنفس الطريقة زيت و مستكة و فحمه في زبدية
بعد التبخير طلعي اللحم و اغرفي الرز و رصي اللحم فوقه و بالهناء و العافية