فرخة محشية بالهنا والشفا علشان خاطر عيونكم

**نوجا28** · 14-10-2006, 09:44 PM

بسم الله انا والله بحب اقولكم على حاجات جربتها بنفسى علشان لو حد جربها يبقى مطمئن والله يا بنات انا بقول اللى جربته وبس
بسم الله

المكونات

فرخة متنضفة وجغسولة جيدا بطريقتك انتى فى غسل الفراخ مش عاوزين نتفلسف ونعقد البنات اللى لسة ميتدئة
كوب ارز مصرى او بسمتى مغسول ومتصفى اللى موجود عندك الجيش قالك اتصرفى
بصلة متوسطة مبشورة
حوالى 350 جرام كبد وقوانص فراخ مقطعة قطع فى حجم نواه المشمش
التوابل(كمون_ فلفل اسود_كزبرة_جوز الطيب ان وجد)
2 مكعب ماجة والملح طبعا حسب نظرتك ورغبتك
ربع كوب زيت
كوب ماء

الطريقة

فى اناء متوسط الحجم نضع الزيت على النار حتى يسخن

ثم نضع فيه الكبده والقوانص المقطعة حتى تنضج ويجف الماء منها تماماويصبح الموجود فى اسفل الاناء هو الزيت فقط
بعد ذلك قومى باضافة الارز المغسول والمصفى من قبل
وهدى النار شوية وقلبى الارز جيدا مع الكبد كانك هتعملى رز ابيض يعنى تقلبى شوية لحد ما ينشف منه الماء يعنى تقريبا لمده خمس دقائق
بعد ذلك نضع البصلة المبشورة ونقلب الارز والكبد والبصل لمدة ثلاث دقائق اخرى ثم نضيف التوابل
وبعد ذلك نضيف الماء والماجى والملح
بعد ان يتشرب الارز للماء سوف تلاحظى ان الارز مازال نىء بعض الشىء لا تنسى انه سوف يوضع على النار مرة اخرى
بعد ذلك ارفعى الاناء من على النار واتركيه حتى يبرد
قومى باغلاق الفتحة العليا للفرخة بخلة الاسنان وقومى بحشو الفرخة سوف تلاحظى ان جوف الفرخة صغير ولن يساع كل الحشو قومى بحشوها من تحت الجلد مثل المطاعم اللى بندخلها نلاقى الفرخة اد الديك الرومى حاجة تغيظ والا يطلعوا شوية رز تحت الجلد
المهم
بعد ما تخلصى الحشو حطى رجل الفرخة على بعضها بالطريقة المعتادة يعنى تكتفيها تخليها فرخة انتيكة وتحط رجل على رجل لو تعرف اللى هيحصلها كانت طارت من الحلة
طبعا انتى حطيتى كبدة الفرخة مع الكبد اللى حطيناها فى الرز لو مكنتيش حطيتيها حطيها وكتفى الفرخة عليها ولو معرفتيش تكتفيها ممكن تخيطيها عادى بالخيط والابرة
ولو كنتى حطيتيها ممكن تجيبى حبة بطاطس صغيرة وتقفلى بها علشان الرز ميطلعش برة
بعد ذلك نضع اناء به ماء على النار ونتركة حتى يغلى ثم نضع فيه الفرخة لمده ساعة تقريبا او حتى نضج الفرخة لما تستوى متحاوليش تشيليها من الحلة لان ممكن تفك منك
حطة مصفى على حلة فارغة وامسكى الحلة اللى فيها الفرخة واقلبيها فى المصفى
الشوربة هتنزل تحت وهتفضلك الفرخة
بعد كده من المصفى تقلبيها تانى فى صينية الفرن المدهونة زيت او سمن وتدهنى الفرخة زيت او سمن
وتدخليها فرن حامى لمده عشرين دقيقة او اقل وتخرج من الفرن وتتقدم مع باقى الطعام وبالهنا والشفااعملى حسابك وانتى بتقلبيها يكون بالراحة علشان متتفتحش منك لانها لو فتحت هيبقى شكلنا وحش اوى فرخة محشية مفتوحة مينفعش هتبوظى الديكور اوى

**حنان(البحرين)** · 15-10-2006, 12:07 AM

تسلم الايادي حبيبتي على الوصفه المشهيه ويعطيك العافيه

**نوجا28** · 15-10-2006, 12:26 AM

كتبت بواسطة حنان(البحرين)

تسلم الايادي حبيبتي على الوصفه المشهيه ويعطيك العافيه

اشكرك يا احلى حنان بصراحة انتى ايجابية ربنا يوفقك وتجربيها وتعجبك وبالهنا والشفا يا حبيبتى

**mesho_khalil** · 15-10-2006, 12:28 AM

تسلم ايديكي يا نوجا .. وصفة حلوة كتييييييييييييييييير

وكل سنة وانتي بالف خير

**نوجا28** · 15-10-2006, 12:37 AM

كتبت بواسطة mesho_khalil

تسلم ايديكي يا نوجا .. وصفة حلوة كتييييييييييييييييير

وكل سنة وانتي بالف خير

يا ميشو يا قمر هى حلوة علشان انتى شفتيها بعنيكى الحلوة وكل سنة وانتى طيبة

**omroro-4** · 15-10-2006, 03:49 AM

تسلمي يا عسل الله يعطيك العافيه

**نوجا28** · 16-10-2006, 12:04 AM

تسلمى يا ام رورو وبالهنا والشفا وكل سنة وانتى طيبة

**meshmesh_2005** · 16-10-2006, 01:07 AM

تسلم ايدك يا نوجا..ما شاءالله انا عجبني قوي طريقة الحشو بتاعتك واسلوبك في العرض والكلام باحس كانك واحدة صاحبتي وقاعدة بتحكي لي عن اللي بتعمليه...اصل انا مبحبش شغل المواقع والبرامج تحسي انهم بيطبخوا اكل غير اللي احنا بناكله اصلا
تسلم ايدك مرة تانية

**نوجا28** · 16-10-2006, 01:31 AM

كتبت بواسطة meshmesh_2005

تسلم ايدك يا نوجا..ما شاءالله انا عجبني قوي طريقة الحشو بتاعتك واسلوبك في العرض والكلام باحس كانك واحدة صاحبتي وقاعدة بتحكي لي عن اللي بتعمليه...اصل انا مبحبش شغل المواقع والبرامج تحسي انهم بيطبخوا اكل غير اللي احنا بناكله اصلا
تسلم ايدك مرة تانية

عندك حق يا مشمش دمك زى السكر وفعلا ساعات تتفرجى على الشيف تحسى انه لما يخلص الاكل ويجى يفتح الحلة هتنفجر والغريب انك تبقى قاعدة قدام التلفزيون كانك بتتفرجى على عملية انتحارية ولعلمك اوقات كتير بحس انه حافظ ومش فاهم ومكونات غريبة على بعض واهو عمال الاستديوا بياكلو اى حاجة بعد ما الاخ يخلص من العك