كشرىمصرى اتحدى اى محل فى صنعه وطعمه وجودته

**نوجا28** · 12-10-2006, 11:53 PM

المقادير
نصف كيلو عدس بجبة (عدس بنى)
نصف كيلو مكرونة اسباجتى ومقصوصة يعنى النصف كيلو يكون مشكل اسباجتى على مقصوصة ربع وربع ربع اسباجتى وربع مقصوصة المقادير طبعا تقدرى تغيريها على حسب عدد افراد اسرتك
نصف كيلو ارز
ربع كيلو شعرية
زيت حسب الحاجة
ربع كيلو حمص طبخ
طماطم حسب درجة حبك للصلصة
ليمون وخل وكمون وملح للدقة
حوالى كيلو بصل او حسب درجة حبك للتقلية
الطريقة
اولا وقبل اى شىء ننقع الحمص من بالليل او من اول النهار ونسلقه ونصفية من مية السلق ونضيف له ملح وليمون وننقعه زى ترمس العيد كل سنة وانتوا طيبين
الخطوة الاولى نغسل العدس حتى يروق الماء تماما ويوضع على نار متوسطة مع نصف لتر ما وملعقة طعام ثوم مدقوق وناعم جدا وكمون ناعم ايضا وقليل من الملح حتى يتم النضح ولا يتعجن منك العدس يعنى الماء يادوب يغطى العدس ولما ينشف الماء يبقى العدس مش معجن يعنى تخليه زى الرز المفلفل ومش نىء
والفكرة دى من محل كشرى اختكم حشرية شوية وكل ما اكل اكلة لازم اسال المطعم فضحت كل الناس اللى بياكلوا معايا فى اى مطعم
الخطوة التانية نحمر الشعرية ونعمل رز بشعرية عادى جدا
الخطوة الثالثة نسلق المكرونة بردوا عادى جدا
الخطوة الرابعة نعمل الصلصة بتقطيع البصل ناعم شوية ونحمرة فى شوية زيت ونضيف له ملعقة صغيرة ثوم مدقوق ونضرب الطماطم فى الخلاط ونضيفها للبصل بعد ما يتحمرملحوظة نضيف الثوم قرب بداية تحمير البصل يعنى لما البصل يقرب يحمر تضيفى الثوم
واخيرا نعمل الدقة ثوم مطحون ناعم جدا جدا
وشوية كمون تقريبا ملعقة شاى كمون و3 ليمونات وملعقتين طعام خل وكوب ونصف ماء وملح حسب الرغبة الثوم تقريبا ملعقة طعام ممسوحة ثم نخلطهم جيدا
البصل يتقطع طرنشات متوسطة السمك ويقلى فى زيت حار ومتحطيش كتير فى الطاسة علشان تحصلى على القرمشة وميتحرقش او يتلسع وياريت تعمليه اول حاجة علشان تاخدى الزيت اللى مكان القلى وتعملى منه الرز والصلصة وتضيفى منه فى سلق المكرونة يعنى تقتصدى لان الزيت بعد ما ياخد ريحة البصل مش هينفع لحاجة تانية وبدل ما يتركن يبقى طازة يعنى تقلى البصل على مراحل مش تملى الطاسة وطلعيه على ورق زيدة او مناديل ورق ومش ورق جرايد لانها خطر جدا جدا علشان حبر الطباعة اللى فيها
الغرف بقى
اولا المكرونة
ثم الرز
ثم العدس
ثم الصلصة
ثم البصل
ثم الحمص
والدقة
وياريت اللى تجربه تدعيلى يا جماعة لانى بجد والله العظيم مش بقول غير اللى جربته بنفسى فى البيت وبالهنا والشفا واى اكلة مصرية انا جاهزة وغير مصرية كمان بس انتوا اسالونى وانا لو اعرف باذن الله هقولكم من غير تردد

**حنان(البحرين)** · 13-10-2006, 12:41 PM

يا هلا بك حبيبتي معانا في المنتدى وتسلم اياديك على الطريقه الطيبه ومشكووووره

**نوجا28** · 13-10-2006, 04:35 PM

تعيشى يا حنان وكل سنة وانتى طيبة وياريت تجربيها ووتعجبك واتدعيلى

**a7la3oyon** · 14-10-2006, 09:49 PM

مشكورة اختي بارك الله فيكي

**ღ ღBentZayedღ ღ** · 14-10-2006, 11:35 PM

مشكووورة أختي ..

**نوجا28** · 14-10-2006, 11:54 PM

العفو يا حبايب قلبى والله عازة استمر بتشجيعكم بس بصراحة البنات هنا كسولة جدا وحتى مش بيردوا يلا بقى كله عند ربنا

**mesho_khalil** · 15-10-2006, 12:32 AM

مصر .. مصر .. تحيا مصر

تسلم الايادي يا نوجا .. والله فكرتيني .. ده انا نفسي فيه .. وحاعمله قريب قبل العيد ان شاء الله

مشكورة نوجاوكل سنة وانتي طيبة...

**نوجا28** · 15-10-2006, 12:35 AM

كتبت بواسطة mesho_khalil

مصر .. مصر .. تحيا مصر

تسلم الايادي يا نوجا .. والله فكرتيني .. ده انا نفسي فيه .. وحاعمله قريب قبل العيد ان شاء الله

مشكورة نوجاوكل سنة وانتي طيبة...

وانتى طيبة يا احلى ميشو ويارب يعجبك والله يا ميشو لو انتى ن مصر مش هتروحى اى محل تانى والله انا بعمله فى البيت احسن من اى محل شكلا وطعما وبالهنا والشفا مقدما يا حبيبة قلبى