بسم الله الرحمن الرحيم
السلام عليكم و رحمة الله و بركاته ،،
أخواتي الحبيبات ،، كل سنة و انتم طيبين العيد بعد بكرة ان شاء الله و أنا مسافرة النهاردة عشان أقضي العيد ربنا يجعله عيد سعيد علينا جميعا
قبل ما أمشي هاكتب لكم طريقة عمل صينية الرقاق و الرقاق ده بنجيبه جاهز من الفرن و اللي ما تقدرش تجيبه هاقول لها على طريقته
مقادير الرقاق :
دقيق حسب الحاجة ، ذرة ملح ، ماء
نرش الملح على الدقيق و نعجنه بالماء لحد ما تتكون عجينة لينة ، نقطع العجينة قطع صغيرة و نسيبها ترتاح نص ساعة ، و بعدين نفده بالنشابة على شكل مستطيل أو مدور حسب شكل الصينية بحيث يكون رقيق و نسخن الفرن و نظبطه على درجة حرارة متوسطة و بعدين نحط الرقاق واحدة بواحدة على صاج الفرن و أول ما تتكون فقاقيع و نحس انه استوى نطلعه بسرعة يعني ما بياخدش وقت خالص و هكذا لحد انتهاء الكمية
طريقة عمل الرقاق:
-نجيب الصينية اللي هانعمل فيها الرقاق وندهنها بالسمن
-نسخن مرقة لحم تكون موجودة عندنا
-نمسك الرقاق و نغطس أول واحد في المرقة من غير ما تلين و نحطها في الصينية و ندهنها بالسمنة أو نقطع عليها قطع صغيرة من الزبدة و بعدين نعمل طبقات تانية من الرقاق بنفس الطريقة حوالي 5 طبقات و نفرد فوقه طبقة من اللحم المعصج و بعدين نحط فوقه طبقات تانية من الرقاق بنفس الطريقة ( نسقيه بالمرقة و نحطه و بعدين ندهنه بالسمنة) لحد ما نعمل برده 5 طبقات و ندهن الوش بالسمنة جيدا
-ندخله فرن متوسط الحرارة لحد ما يبقى دهبي
وبالهنا و الشفا
الروابط المفضلة