تعتيق .. تعتيق .. تعالووووووووا

**المشكاة** · 14-10-2002, 03:50 PM

يا هلا ومرحبا باغلى بنات ..
وعدتكم قبل فترة انى انقل لكم تجربتى فى الصبغ .. ادرى انى اتأخرت عليكم كثير، بس اتعرفون الواحد لما ايجدد بيته اشكثر ايكون مزحوم وياخذ وقت لحد ما يرجع ايرتب الاغراض مرة ثانيه خاصة اثناء فترة المدارس.
على العموم الصبغ سهل جدا جدا جدا مهب مثلما نحن متوقعينه صعب ومرهق بس ابشرط انه الصبغ ايكون مائى . وخلنى اخبركم عن تجربتى بالتفصيل:
طبعا كان الصبغ السابق عندى مائى علشان جذيه ما احتجت انى اقشر الصبغ وهذا سهل من المهمه كثير ..
اولا غطينا بالشريط الاصق العريض كل الابواب والشبابيك والمكيفات وفيش الكهرباء وغطينا الموكيت بورق السفرة الرول مع تثيبت الاطراف بالشريط اللاصق.
الخطوة الثانية قسمنا الجدار الى نصفين وحطينا الشريط اللاصق العادى مو العريض على الجدار بالكامل بعد ما اخذنا القياسات وفيه اداة سهلت مهمتنا بس ما اعرف اسمها اهى تشبه الميتر اللى ناخذ فيه القياس بس فيها حبل مليان بطباشير ملونه وهى معروفة عند محلات الدهان.
الخطوة الثالثة اخترت لونين صبغ واحد منهم هو اللون الاساسى واحتجت لعلبه كبيرة وخففته بالماء يعنى تقريبا اضفت قد ربع كمية السطل ماء
وبواسطة الرول الخاص بالصبغ صبغنا الجدران بالكامل بالطبقة الاولى وبعد نصف ساعة الطبقة الثانية وتراه ايجف ابسرعه
الخطوة الرابعة التعتيق واهنيه جبت علبة صبغ متوسطه .. انا عتقت النصف الاسفل فقط لانى اعتقد انه تعتيق الجدران بالكامل يعطيك مظهر حاد فاما انك اتعتقين نصف الغرفة الاسفل او جدار واحد فقط من الغرفة.
اخترت نفس درجة اللون الاساسى بس اغمق شوي وبالاسفنج البحرى ضغطت على الصبغ بطريقة عشوائية ضربات خفيفه.
اول ما بدأت التعتيق جربت فى امكان غير ظاهره مثل خلف الباب او خلف خزانه لحد ما تكتسبين خبره وخفة فى حركة اليد.
وبس هذا التعتيق .. صدقونى المسألة كانت مثل اللعب، هذا غير الجو المميز بينى وبين زوجي طول الوقت نكت وتعليقات على بعض .. وبعد ما خلصنا كنا ما امصدقين انه هذا شغلنا، كنا طايرين من الفرحة ومو امصدقين نفسنا ..
وبعدين حطينا فى الفاصل بورد من ورق جدران بس هذا تعبنا كثير ووصخنا الطاولات اشوي صحيح النتيجه كانت مبهره لكن مجهده علشان جذيه انصحكم اذا حطيتوا بورد اما تختارون النوع اللى فيه لاصق ابروحه مثل جلاد الكتب او اتجيبون احد ايركبه علشان الخبره.
وأي سؤال انا حاضره بس بغيت اخبركم انى عرفت انه اصباغ جوتن احسن من اصباغ ناشيونال (دعايه) وفيه شي بعد
انا جبت صباغ واخذ القياسات وشرحت له ايش اللى اريده وقالى ان السعر 5000 درهم ولكن المسألة لما نفذتها ما كلفتنى 100 درهم من صبغ وفراشى واسفنج ورول.

وفى النهاية اريد اشكر كل البنات اللى ما قصروا وساعدونى وتأكدوا انى دعيت لكم كلكم دعوة فى ظهر الغيب الله يجعلها فى ميزان حسناتكم.

**الـرايقة** · 14-10-2002, 04:09 PM

ماشاء الله تبارك الله عليك يالمشكاة ....

الله يلبسك لباس الصحة والعافية أنتي وزوجك ....

حلو إنك تطبقين التعتيق والدهان عموما بإيدك شيء حلوو و ممتع ....

وراح أجربها إن شاء الله ، بس لما أنقل للشقة الجديدة

زوجي كأنه موواثق بقدراتي .......بس الله يجزاه خير يقول عندك غرفة المعيشة جربي فيها

وإذا أثبتي جدارتك ......صرحت لك بعمل باقي البيت

<<=== حشى مو دهان معاملة حكومية

بس المشكاة.....

ماقلتي لنا بأي طريقة عتقتي الجدار .....؟؟؟ إسفنج أو كيس بلاستك أو قماش ..؟؟؟

تحياتي لك .

**المشكاة** · 14-10-2002, 04:20 PM

هلا والله بالرايقه
اتوكلي على الله وجربى
وانا عزيزتى عتقت بواسطة الاسفنج البحرى

**الـرايقة** · 14-10-2002, 04:28 PM

فعلا تأثير الإسفنج البحري رااائع وناعم للغاية.....

قواك الله أختي ...

**ran-2000** · 14-10-2002, 04:29 PM

مبااااااااارك عليكم الصبغة الجديدة ياالمشكاة ..
وعقبااااال ما تصبغي بقية البيت ..

**شمالية غربية** · 14-10-2002, 04:41 PM

هلا فيك اختي المشكاة ..
ماشاء الله تبارك الله ..مبروووووووووك عليكم اللي البوية الجديدة ..

لما قلتي تجربتك اول مره , قلت لزوجي خليني اصبغ انا بيدي , لكنه مارضي ..اهئ اهئ اهئ .

يقول لي هذي البويه مضره ,لكن العمال متعودين عليها ...وانا نفسي اسوي شي بيدي ..وابي ا

اواصل الزن عليه , لكن بعد رمضان باذن الله

**بنت القصيم** · 14-10-2002, 04:53 PM

أهلين أختي المشكاة بس ماشاء الله عليك قدرت تغامرين بالصبغ بسوالله شيءحلو الواحد يجر بنفسه
لكن والله تمام عليك وإنشاء الله أبسوي مثلك بس أدعيلي أنجح مثلك

**البيتوتيه** · 14-10-2002, 05:03 PM

ماشاء الله عليك والله شجعتيني اصبغ الشقه الجديده بنفسي ..الله يعطيك الف عافيه يا رب

**المشكاة** · 15-10-2002, 04:37 PM

الله ايقويج يالرايقه ..

مرحبتين بالران يا نوارة المنتدى .. والله ايبارك فيج حبيبتى وعلى فكره انا اخترت الالوان اللى خبرتينى عنها وطلعت روعه ومناسبه جدا ..

عزيزتى شماليه الله ايبارك فيج وترانى ما اتحمست انى اسويها الا بفضل ردودكم وتشجيعاتكم لى، وبالنسبه للبويه ما اعتقد المائى منها مضر لانه ماله ريحه مزعجه ويجف ابسرعه وتتخلصين من آثاره من اليد بسرعه بالماء فقط .. بس لاتنسين انه انا زوجى ساعدنى علشان جذيه كانت المغامره حلوه (ترانا ما نستغنى عن مساعدتهم لنا).

هلا ببنت القصيم اتوكلي على الله صدقينى ما اقدر اوصف لك الشعور اللى بتحسين فيه لما اتخلصين الصبغ وتشوفين عمايل ايدك فخر واعتزاز والله كأنك وصلت القمر

البيتوتيه الله ايعافيك واعتقد انه الشقه بتكون اسهل من البيت بس انتى اختارى الوقت المناسب ولا تترددين وانصحج اول ما تبدين بغرفه داخليه علشان تكونين اكتسبتى خبره لما تولصين للصاله ومجلس الضيوف.