من مطبخ نور الهدى لمونى الجميلة أحلى صينيه أم على بالباف باستيرى هدية رجوعى وسطكم
وحشتونى يا حلوين كتير كتير فتره كبيرة أوى لا دخلت القسم ولا نزلت موضوعات لكن لما دخلت من أيام لقيت حاجات تجنن والله أغرتونى جدا جدا
لدرجة اتكسفت أنزل موضوعى المتواضع بس مونى الجميله شجعتنى يارب الوصفه تعجبكم
أم على بالباف باستيرى
من أحب الوصفات لقلبى لأنى بحب الدسم جدا ادعولى ربنا يبعد عنى الدسم وأبقى زى نانسى وهيفاء مع انى مش تختوخه أوى أوى يعنى هما كل الحكايه 71 كيلو (شفتوا النحافه)
نرجع بقى لأم على طبعا ممكن نستخدم بواقى فطير مشلتت مثلا او جلاش بعد تحميصه أو بواقى كرواسون او الرقاق المصرى الناشف
لكن تبقى أم على بالبف باستيرى الأفضل طعماً ومذاقأ لان عجينه البف غنيه غنيه بالطعم الرائع
المقادير
2 عبوة باف باستيرى
3 كوب حليب فاتر
نصف كوب كريمه لبانى (وممكن استبداله بعلبه صغيرة من القشطه الطازجه )
خلطه المكسرات وهى عباره عن كوب كبير من
بندق...فستق.....عين جمل....زبيب.....لوز......وجوز الهند وطبعا الخلطه دى اختيارى
ملعقه زبده سايحه
توابل ام على عباره عن (سكر وقرفه وحبهان)
الطريقه
نقطع الباف قبل الخبز بهذه الطريقه لان تقطيعها بعد الخبز بيخليها تتفتت كتير اوى بسبب هشاشتها
وطبعا مش محتاجين ندهنا اى شئ ونسيبها حوالى ربع ساعه
ودى خلطه المكسرات الجامده انا بحبها بكل المكسرات دى
وعلى ما تستوى العجينه فى الفرن نحضر الحليب الفاتر ونضيف السكر والقرفه ورشه حبهان خفيفه انا بعشق ام على بالتوابل دى ونضيف نص كوب كريمه لبانى او علبه قشطه صغيره عالحليب اصل أم على متبقاش أم على غير بكميه الدسم دى
وأدى الست باف باسترى احمرت واتنفخت محدش قدها بقى دى داخله فى أم على أكله الملوك
وفى صنيه ام على نحط الباف اللى استوت مع المكسرات بالشكل ده
نضيف الحليب اللى حضرناه بالكريمه والتوابل والسكر ونغطس المكونات بالملعقه
وبعدين بدهن الوجه بمعلقه قشطه مع زبده سايحه طبعا لزوم الدايت والريجيم هاهاهاهاهااااااااااااه ونستضيف الصنيه فى الفرن ربع ساعه وبعدين نحمر وشها ونقدمها
بصراحه كلمه روعه قليله عليها جربوها ومش حتندموا وعلى فكره ممكن تستخدموا القوالب المينى اللى بتدخل الفرن وتعملوها فيها بعدد
الضيوف او افراد الاسره لو مش حابين صينيه كبيره
ودى كانت وصفتى ليكم وان شاء الله اتواجد باستمرار معاكم بشكرك يا مونى انتى وام البنات على تشجيعى ربنا يبارك فى اللمه الحلوة
دى
دمتم فى رعايه الله
[
رد مع الاستدلال
كتبت بواسطة **ام البنات **
مدونتي مطبخ ام مرمر و ليلو
الروابط المفضلة