العجة المصرية (أما أكون راضية على اللى فى البيت) لأطباق الفطور والعشا لعيون بيروووووو
بسم الله الرحمن الرحيم
السلام عليكن ورحمة الله وبركاته
زى ما العنوان بيقول
أما أكون فايقة ورايقة وراضية على الاولاد وباباهم أقوم أعمل لهم حاجة (فخيمة) عليها القيمة فى الفطار أو العشا أو السندوتشات
***نقطع 3 بصلات حلوين (من غير كبة بلاش كسل مش عايزينهم مفرومين) ونشوحهم فى ملعقة زيت لغاية ما يدبلوا بس من غير ما لونهم يتغير
**وبعدين ياحبيبتى انتى وهى نسيبهم يبردوا
**نضيف حزمة شبت على حزمة بقدونس على حزمة كزبرة متقطعين ومغسولين ومتصفيييين
**ونضيف 1/2 كوباية دقيق على 1 ملعقة صغيرة بيكنج صودا او كربوناتو او بيكنج بودر
**ونضيف 6 بيضات (من غير قشرهم انا باقول اهو) وسنة فانيليا على نقطتين خل وملح وفلفل اسود وبابريكا
**وممكن تضيفى طماطماية او اتنين متقطعين مكعبات صغيرة وانا باحب اضيفهم بيعملوا تكنى كلر كده (ما تسألوش يعنى ايه النهاردة الموضوع بمصطلحات حصرية للهجة المصرية هههه)
**تدهنى صينية سورها واطى بزبدة او سمنة وترشيها دقيق (كأنك بتعملى كيكة)
**تصبى فيها الخلطة وتدخليها فرن وسط لحد ما تستوى وتحمر ( ماتعليش الفرن اوى احسن تحمر وقلبها معجن لان فيها دقيق)
**وانتى قاعدة مستنياها ما تضيعيش وقت حضرى الجارنيش أو الديكوريشن أى التزيييييين
***أما تطلع بالسلامة من الفرن سيبيها ياعينى تريح وتدفا شوية
**وبعدين قطعى وزينى وقدمى
ومطرح ما يسرى يمرى
رد مع الاستدلال
مدونتي مطبخ ام مرمر و ليلو
كتبت بواسطة asmaabhr
الروابط المفضلة