طبعا ياحبايبى لازم نرجع للحكايه الاول
الست هنا بعد ما جوزها حكم رأيه وقال لها انا بدى عشى عشى مش اى كلام
قامت هنا تلف وتدور وتروح وتيجى طب اعمل ايه ياربى فا الراجل ده
راحت هنا قالت لالالا انا لازم ابيض وشى قدام سى السيد بس المكونات ناقصه عندى اعمل ايه اعمل ايه
مافيش الا جارتى حبيبتى لما اروح استلف منها حاجه ولا حاجتين تساعدنى فى المأزق ده
وراحت هنا وخبطتت على جارتها
جارتى ياجارتى
افتحى ياجارتى
قالت لها خير ياحبيبتى مالك ياختى
قالت لها هنا : اه ياجارتى سى السيد ياختى هايفقعلى مرارتى
عايز عشى مش اى كلام والمكونات ناقصه عندى ممكن تسلفينى ياحبيبتى
ردت الجاره: ومالو ياحبيبتى الجيران لبعضيها عايزه ايه ياحبيبتى
هنا مكسوفه تطلب قالت لها : يعنى لو عندك لفه جلاش وشويه لحمه مفرومه
قالت لها جارتها الكريمه : ينهار ابيض ياهنا انتى تأمرى ده انتى حبيبتى
وبعد شويه اخدت هنا المقادير وراحت على مطبخها تشوف هتعمل ايه
عصجت هنا اللحمه
وفتحت لفه الجلاش وقالت هاعمل
جلاش بحشوه البيتزا
ورصت نص اللفه وفى النص
حطت صلصه بيتزا
بعدين حطت اللحمه المعصجه
وطماطم وفلفل وزيتون وبصل كله مقطع
وقفلت باقى الصنيه بالجلاش وصبت عليه كوب لبن كبير فيه بيضه ووضعت الصنيه فى الفرن
وراحت هنا تعمل شوربه عدس
حطت كوب عدس على النار مع فصوص ثوم وبصله واستغنت بقى عن الجزر وقالت بيمشى الحال
وبعد ماستوى كويس العدس صفيتو فى الخلاط وشوحت بصله صغنونه فى شويه بصل وضافتها على الشوربه وتركتها تسخن
فتحت هنا تلاجتها لقت حبه باذنجان كبيره اخدتها وقطعتها شرائح طوليه ورشه ملح عليها وبعد نص ساعه قلتها فى شويه زيت وصفتها على ورق نشاف
فتحت هنا تلاجتها وجابت جبنتها ورشه عليها رشه نعناع واورجانو
وعلى شرائح البتنجان حطت الجبنه ولفتها صوابع زى المحشى
وفى طبق يصلح يدخل الفرن حطت هنا شويه من صلصه البيتزا
ورصت صوابع البتنجان فيها وعلى الوش شويه صلصه وجبنه متزريلا كمان
ودخلت الطبق الفرن و دقائق وكل الاكل اصبح جاهز لسى السيد
يارب تكون هنا خلت سى السيد ينبسط
الروابط المفضلة