ممكن مساعدة من المصريات

السلام عليكم ورحمة الله وبركاته
كل سنة وانتم طيبين وعيد سعيد عليكم إن شاء الله
محتاجه مساعده منكم علشان عندى عزومه ثالث يوم العيد
والناس اللى جايين مابيشربوش غير القهوه
بس انا خيبه فى عمايلها
وعايزه اعرف لو حد طلبها منى مظبوطه او على الريحه او زياده
يبقى اد ايه مقدار السكر
وشكرا جدا لكم وجزاكم الله خيرا

اهلا حبيبتى
شوفى ياقمر انا هقولك طريقتى فى القهوة ومقادير السكر لكل نوع
لو زيادة معلقتين سكر
لو على الريحة ربع معلقة سكر
لو مضبوط معلقة سكر
لو سادة اكيد بدون سكر
وكل المقادير اللى فاتت دى بتاخد معاها ثابت معلقتين بن صغيرة ممتلئة
وبتقلبيهم كلهم على البارد وبعدين على النار تقليبتين وتسبيها شوية تكون طبقة الوش ولكن دون ان تغلى ويقلب الوش ويضييييييييع

بصى

دلوقت للفنجان الواحد
بتملى الفنجان ميا وتحطيه فى الكنكة وتزودى عليه ميا حاجة بسيطة
بعد كدة بتحطى معلقتين بن صغيرين فى الكنكة وتقلبيهم ومعاهم السكر لو هيتحط
بعد كدة بتولعى النار الهادية وتحطى الكنكة وتبقى عينك مفتحة قوى
اول ماتلاقى فيه فقاقيع ظهرت ع الأطراف تنتبهى جدا
هتلاقى فيه طبقة كانها بيضا ابتدت تظهر ع الوش
هنا بقى يفضل تمسكى الكنكة وترفعيها شوية فوق النار يعنى ماتخليهاش محطوطة على عين البوتاجاز
يعنى تخلى النار تلمسها من بعيد
خلاص كدة اتكونت الطبقة البيضا اللى هى الوش
قبل ماتعلا القهوة منك وتفور فى بداية ماتعلا كدة
ابعديها عن النار وصبيها

بالنسبة للسكر بقى
طبعا لو سادة هيبقى من غير سكر
لو ع الريحة يبقى السكر فى طرف المعلقة خالص
لو مظبوطة يبقى معلقة سكر
لو زيادة معلقتين سكر

ملحووووووووظة مهمة

لو بتعملى اكتر من فنجان فى كنكة واحدة
لما تيجى تصبى القهوة فى الفناجيل
تصبى الأول شوية فى كل فنجان عشان الوش يتوزع ع الكل
يعنى ماتصبيش الفنجان كامل فى الأول
لأ تصبى شوية فى كل واحد وبعد كدة ترجعى تصبى عليهم وتكمليهم لآخر الفنجان
فاهمانى؟؟؟
وربنا ييسرلك وتطلع قهوة اجمل من كدة مفيش

يالا اهى شهد الملكة سبقتنى اهى ربنا يكرمها
معلش بقى هتلاقى كلامى مكرر
عشان انا كنت فى صفحة الرد لما كتبت

جزاكم الله خيرا
شكرا ياشهد وشكرا ياشمس
اكيد القهوه هاتطلع زى الفل بطريقتكم
ربنا يناولكم ليلة القدر إن شاء الله
ويناولها لجميع أمة محمد اجمعين