السلام عليكم ورحمة الله وبركاتة
قصيده باللهجة العامية بعنوان
طموح
فجأة والعفريت طلع له
قاله :قولى تطلب ايه؟
قاله: هتجيب اللي عايزه؟
قاله: طيب قول عليه
فكّر المسكين فى نفسه وابتدا عنيه يلمعوا
قال: ما دام عفريت وجانى برجله يبقى استقطعه
هب راح ماطط شفايفه وانحني والجن شايفه
وابتدى يبرطم تمام زي البرابرة
فجأة صاحبنا اتعدل عدلة جبابرة
شد استك بنطلونه بغيظ وحله
بص واتقرنن على العفريت وقال له!!
قاله : هات لي رتل جاز يملي البابور
هات لي خرقةنضيفة ليها اى لون
خرقه تنفع تبقى رقعة بنطلون
هات لي حتة لحمة لابنى احسن مخستك
أما بنتي هات لها شبشب بلاستيك
هات كمان لمراتى حتة جلابية
هات نشا نعمل به صحن مهلبية
بص له العفريت بقرفة وقال يادون
هو أنا يا نطع في وزارة الشئون
يا بني أنا العفريت بحاله يعنى تطلب حاجة عدلة
قول دهب ألماظ زمرد
قاله : جينا للمجادلة
يعني هتحمرق فقاله الجن : ما تبقاش ملزق
عايز الاشباح تقول عفريت مهزأ
طب ورحمة امى من غير ما تعوز
لأملا بيتكم بالجواهر والكنوز
قبل ما العفريت ده يدخل فى السكات
التقاه م الفرحه أو م الدهشة مات
بص له وقال: يا نهار اسود ع اللي هببته وعملته
هى دى اكبر مصيبه انى جيت اسعده قتلته
هذة القصيده لشاعر اسمه صلاح الدين عبد الله
اتمنى تعجبكم
رد مع الاستدلال
الروابط المفضلة