وعليكم السلام ورحمة الله وبركاته
اهلين بام أيوب آنستينا
آهو ماشاء الله تعرفي في الامثال شن اتقولي ما نعرفش و على العموم صحيتي علي التشجيع و امتا ما تتفكري مثل اكتبيه ما تبخليش علينا اما بالنسبة ليا اني مش موقفة موتية مجموعة باهية انشاء الله تعجبك..
و قوليلي شن رايك يقعد الموضوع هني ولا في ركن الالعاب و الترفيه احسن ؟؟؟
سلامات

السلام عليكم ورحمة الله وبركاته

اهلآ بيك ماريا

شوفي بالنسبة لموضوعك هو حاليآ في ركن الألعاب و الترفيه وآني إنحس انه مناسب
ليه لأن موضوعك عالأمثال و الأمثال فيها نوع من التسليه و الترفيه

طنجرة و لقت غطاها

نشكر بنتي ما إندم تكنس الكناسة و ما تلم

السلام عليكم ورحمة الله وبركاته
اليوم بنكتب أمثال شعبية و نضيف عليها بعض التعابير الشعبية المشهورة في ليبيا اللي بندرس فيها جانب من تراثنا الشعبي و هادي التعابير هي حصيلة تجارب و ذخيرة نتاج الحس و الاحساس الجماعي ، و نبدا بالامثال.

علي قد كساتك مد رجليك أو علي قد لحافك مد رجليك
و معنى المثل علي قدر استطاعك اقضي حاجتك

يا داير يا لاقي
المعنى العام لهدا المثل ان اللي يدير حاجة يلقاها اللي يدير الباهي يلقى الباهي....

واللي بيدير الخير ما ينشدش

اللي يبي الحلو يصبر على مره

كان عجبك رخصه لوح نفصه

اللي اوله شرط آخره سلامة

و توة ناخذو شوية تعابير شعبية و بنشرح بالفصحى باش يفهموني الاخوات الغير ليبيات
وسع بالك كلمة تكثر في حديث الناس لطلب الصبر و سعة الصدر .
ما فيهاش درقة ...اي سترة فقد غدا المستور واضحا من صداقات او عداوات و كما يقول المشارقة (على عينك يا تاجر).
قريب يقيمه من الوطا الوطا... الارض في اللهجة..و كلمة قريب هنا بمعنى يكاد و المقصود هنا الاهتمام المبالغ.
قالو لجحا عد موج البحر قال الجايات أكثر من الماشيات حتى جحا يشده أدب البحر من اذنه ويضعه ليعد موج البحر و يكون نوع من الاجوبة المسكتة .
و نختم موضوع اليوم بقصة ربما تكون طريفة وهي تدل على عمق الايمان و صدقه :
ربي يعرف ميمونة و ميمونة تعرف ربي و هي حكاية من المرويات ... كانت خادمة تصلي و يظهر انها لم تحفظ السور كاملة او كيفية الصلاة و الدعاء.. و اشار اليها احدهم ليس هكذا العبادة و الصلاة يا ميمونة ! فاجابت في براءة و صدق و عفوية ربي يعرف ميمونة و ميمونة تعرف ربي.
و غدت الكلمة مثلا شعبيا ، للدلالة على حسن النية.
و السلام عليكم ورحمة الله وبركاته

ما شاء الله
أمثال ولا أحلى

السلام عليكم و رحمة الله و بركاته
كيفكم يا بنات
بصراحة انى مستغربة علاش تم نقل الموضوع لمنتدى الالعاب و الترفية .؟ شن علاقته بالالعاب و الترفيه؟
انى باعتقادى انسب مكان ليه منتدى السفر و السياحة او الملتقى العلمى و الادبى لانه يحتوى على معلومات تخص الثرات.
على اى حال اطلبى من احدى المشرفات نقله . لانه حتبقى فى سباق مع الالعاب .
بس ما توقفيش
و احنا معاك.
و هاكم مثل على طريقى :
اليد ما تصفقكش بروحها : و هو مثل يحث على التعاون بين الافراد.

السلام عليكم

اهلين بالاخت عروبة نورتي الموضوع

السلام عليكم ورحمة الله وبركاته
كيف حالك يا رواد انشاء الله كويسة ،، اني كويسة و الحمد لله ،، قرأت بأنك تمري بظروف صعبة انشاءالله ربي يكون في عونك و ننصحك بقراءة سورة ياسين و انويها لتفريج الكرب لان سوره يس لما قرأت له.
و اني اخديت بنصيحتك و راسلت الاخت السلطانة ووافقت على تحويل موضوعي الى فيض القلم على الاقل افضل من الالعاب و الترفيه .
السلام عليكم

السلام عليكم ورحمة الله وبركاته


مسيكم بالخير ...اليوم بنتكلم علي مجموعة من الامثال و التعابير الليبية اللي ما تخلاش هذرزتنا منها و بشكل يومي نقولو.........

ما لحقش العنقود قال قارص

صاحب سبع صنعات ما عنداش صنعة

يا هارب من الغولة يا طايح في سلال القلوب

خششني انطلعك اغرسني انقلعك
وتوة نقولو شوية تعابير مع الشرح و اليوم بنتكلموع( البــــــــحــــــــــــر )

يقولوسبسي الرايس ما يحرقش المركب سبسي في اللهجة الدارجة بمعنى ...سيجارة و لفيفة الدخان وهو تعبير يدل ان الحاذق الخبير يعرف شؤون عمله...فاذا اشعل الرايسفي مركبه دخينة يكون حذقا فلا يحرق مركبته وهو تصوير طريف.

نسمة بايتة يعني هادئة ... و هو اصطلاح الصيادين و البحارة ..و يضرب ايضا للهدوء.

النسمة من قراجيم الحوت اي حلقوم و خياشيم الحوت و هو يضرب للجو اللطيف و الهدوء .

الحوت عليه ... او فلان ياكل في الحوت و الحوت من اساليب التفائل و التشائم و و يدفعون به شر العين و حاسد و ما حسد متل الاصابع الخمسة و تعليق الخميسة والقرن.. وهي غدت عبارة ترجيب و تدليل ..يقولو حويتة ..الحوت عليه !

حوت ياكل حوت هو مثل او تشبيه يكاد يكون عالميا يمثل صراع القوي و الضعيف ...حوت ياكل حوت و قليل الجهد يموت .

و يقولو زي من يحرت في البحر

نجي الغارق وخاف لايغرق

خطاف زي طير البحر

طير البحر و طيرالبر عمرهم ما يتلاقو

مات البحر و صلى عليه الحوت دلالة على انتهاء موضوع من الموضوعات و انقضاء حالة من الحالات . فهل يموت البحر و هل يصلي الحوت ...؟ام هو من التعابير الفنية في مجال التأتير البحري في الادب الشعبي.

علمناهم العوم سبقونا في البحر هي شؤون الحياة و طبعا قد تعلمه شيئا فيتفوق عليك...

ما جي للبحر الا و هو عوام ! تصوير لانسان يقدم على امر و هو جديربه.

الغارق يشد في تبنه

قاله شن صار ياحوات قاله اللي في الشبكة راح

البراني يغرق المركب والسانية للعمار و المركب للرايس

زي حوت المرسى ياكل في الطعوم و يخرى عالسنارة

و يقولك
بعد قرة الصرفة ابني علي الشط غرفة
و بعد قرة الحسوم ارمي عباتك وعوم

و السلام عليكم ورحمة الله وبركاته

مشاءالله ماريا يعطيك الصحه

السلام عليكم ورحمة الله وبركاته
الله يسلم و يخليك اختي العزيزة مصراتة
جزاك الله خيرا