بسم الله الرحمن الرحيم

قالك صاحب العقل الاسم مقتبس من برنامج يعرض على القناة الليبية و هو برنامج يتناول الشعر و الامثال الليبية ..
فكرت في موضوع جديد و متميز في طرحه تكون فيه السياحة ثراثية شعبية للتعارف على العادات و التقاليد من خلال الامثال الشعبية و ارجو من اخواتي الليبيات مشاركتي في طرحها لاني وبالتأكيد لا أستطيع حصرها لوحدي و نأمل من الاخوات العربيات المشاركة و الرد بما يناظر ذلك :

و توة بنتكلم ليبي باش ناخد راحتي في تفسير الامثال توكلنا على الله

(الربيع من فم الحوش يبان) هذا المثل يناظره المثل العربي اللي يقول ( المكتوب مبين من عنوانه)و المثل ينطبق على تفسيره.

(الجمل ما يشبحش لعوج رقبته ) و هذا المثل ينقال في اللي يعجب عيوب الناس و ما يشبحش لعيبه لان ما فيش انسان معصوم من الخطأ.

(ما تعجب يا عجيب لين تشوف شن اتجيب) هذا المثل يضرب في الشخص الي يعجب او زي ما انقولو (يتشمت) في الناس عند وقوعهم في الاخطاء و يذكره بان الانسان لا يعلم ما يخبئه القدر.

(صاحب العلة ينخصوه مرافقه) يعني صاحب المشكلة او اللي دايرها هو اول من يتكلم ويدافع علي نفسه قبل حتى ما يشكو فيه .

يتبع.....

مشاءالله ...استمرى واحنا معاك انا من محبى سماع الامثال بس متوقفيش

السلام عليكم ورحمة الله وبركاته
ماشاء الله عليكم ولا قوة الا بى الله يابنات بلادى منورين المنتدى
انى اول مرة انخشى على هدا القسم والله افرحت ماشاء الله هدرزة ليبيه وامثال شعبيه
ناقصتنا غير عالت الشاهى
بارك الله فيك ياماريا على هدا الموضوع ياعطيك الله الصحة وزى ماقلتلك اختى المصراتية استمرى واحنا معك
وتوة هيا نقوللكم اشوية امثال ماداما اطواسة لاول على النار
ايدوار ايدوار الشعير ويرجع الى قلب الرح

ياشراب البن مرجوعك الى الماء

على قد اغطاك مد رجليك

وتوة بى السلامة

السلام عليكم و رحمة الله و بركاته
ما شاء الله ..
شنو يا ماريا ... ايه هكى النشاطة و الا بلاش
حلوة الامثال الليبية , و خاصة اللى بالشعر الشعبى .
لكن الاحسن امتى تكون اصلها قصة و بعدها صارت مثل .
انى توا انقوللكم واحدة:
قالك هذا فيه مجموعة بنات طالعات يحطبوا فى الغابة . و الباين انه كان يترصدلهم مجموعة شباب من بعيد .
فواحد منهم عجباته واحدة و قعد ينتظرها كل يوم ,,و طبعا لخجلهم كانوا يتحشموا يكلموا البنت على طول.
وخجله الزايد ههههه, قعد ينتظرها يوميا لمدة سنتين دون ان تعلم هى , و بعدها فتح ربى عليه و دار اشارة على اساس
انه (مهتم) و استمرت النظرات لمدة سنتين اخرتين.
و بعد الاربعة سنين ارسل لها مرسال يخبرها بعواطفه و انه راغب فيها و يريد خطبتها.. و استمرت المراسيل و الخطبة لمدة سنتين اخرتين.و بعدها بداء فى التحضيرات للعرس و ما تابعه و استمرت هذه المرحلة ايضا سنتين,

فيقول المثل
عامين غير شبح بالعين
و عامين ضرب المعانى
و عامين دز المراسيل
و عامين باش جيته وجانى

و يضرب المثل لمن يضيع الوقت فى امور هى افضل لها العجلة و خاصة اذا كان ضياع الوقت ماليشى لازمة
ما حدش يسالنى العروس قداش عمرها لما تزوجت ؟؟؟؟؟؟؟؟؟؟؟
لان هذه قصة بس.
ان شاء الله عجبكم المثل
و السلام عليكم و رحمة الله و بركاته

السلام عليكم ورحمة الله وبركاته

الله يسلمك ويخليك صحيتي يا مصراتة

و بما انك من محبي الامثال الشعبية شاركينا باللي تعريفيه و نوعدك باني نستمر غر خليكم معاي

مشكورة

السلام عليكم ورحمة الله وبركاته

مرحبتين بيك وخيتي (حليمة 4) اتفضلي الحوش حوشك و منور بوجودك

ديمة زورينا و سمعينا الامثال وعلي قولتك التقعميزة ما ناقصها غير عالة الشاهي

الله يبارك فيك

السلام عليكم ورحمة الله وبركاته
يا مرحبا يا مرحبا نورك طفا الكهربا ....
اهلين و سهلين برواد آنستينا ونور المكان بوجودك و الله زارتنا البركة
صحيتي علي هالتشجيع و الله حسك رفعتيلي معناوياتي ، و ما شاء تريتك فالحة في الامتال ديمة سمعينا هالقصص الحلوة و صدقيني نقرة فيه ونقول امالا قداش ولا عمرهم ....
و ماتحرمينلش من طلتك الحلوة
والسلام عليكم ورحمة الله وبركاته

موضوع رائع يا ماريا ،، يسعدني كثيراً ان أتعرف على الامثال الشعبية فى دولة شقيقة مثل ليبيا

ولكن تعالوا نذهب سوياً الى ركن الاخاء حتى يشارك معنا أكبر قدر ممكن من الاخوات الليبيات ولكي يستفيد عدد اكبر من الاخوات من بقية الدول الاخرى

السلام عليكم ورحمة الله وبركاته

حلوة فكرة الأمثال الشعبية و ياالله كملي خيرك وقفتي ولا تبي تشجيع
عمومآ انا من ضمن المشجعين لموضوعك لكن في الأمثال ياودي مانعرفش هلبة الله علي ايامات زمان كنت نحب نسمعهم بس توا مع الغربة يادوب تسمى وحدة تتكلم ليبي

شكارة العروس امها و خالتها و 10 من قبيلتها

بو زيد ما يباعد بعيد

كل شاه معلقة من قراعها

راجي يا عمر لين يجيك الزيت من غريان

دور دور و عشانا فول

السلام عليكم ورحمة الله وبركاته
مشكورة اختي السلطانة و انا ايضا تسعدني و تشرفني مداخلتك اللطيفة.
و تسعدني مشاركة الاخوات العربيات ، و لكن اتمنى ان يبقى موضوعي في ركن السياحة و السفر لا ان ينتقل الى ركن الالعاب و الترفيه ....
جزاك الله خيرا