ربي يسعدكم أوقاتكم ويبلغنا واياكم رمضان ويكتب لنا العتق من النار جميعاً يارب
رح نزل اليوم طريقتي بعمل حلاوة الجبن ويارب تعجبكن
المقادير
جبنه موتزريلا أنا بجيب الكيس فيه كره وحده وزنها 125 غ
ولكل 125 غ جبنه
فنجان قهوه صغير سميد انا السميد بالصوره مبين كتير لاني زودت جبنه كمان
معلقة سكر
ظرف فانيليا
معلقه ماء الزهر او الورد
فنجان قهوه حليب سائل
طبعا بتزيدي الكميه حسب الجبنه
والحشو
ممكن تكون جاهزه او انتِ تعمليها بالبيت
وفي الها طرق كتيره كل وحده وطريقتها
وقطر او شيره
فستق مبشور للزينه
الطريقه
بفتت الجبنه لقطع صغيره وبضيف السميد والسكر والفانيا وماء الزهر والحليب وبضعه على نار هاديه وبقلب بشكل مستمر
لحتى تتشكل عندي كره
وبعدها بدهن اي سطح مستوي بالقطر او ممكن نايلو حتى يسهل اللف وبمد الجبنه على شكل مستطيل وبضع الحشوه على طرف العجينه وبلفها بشكل اسطواني
وبحاول كل شوي اضع قطر حتى ماتلزق
بتركها بالثلاجه تبرد وبعدها بقطعها قطع صغيره وبرش فوقها الفستق المبشور والقطر ومنقدمها وصحه والف هنا
يارب تكون عجبتكن الطريقه وتجربوها وتزبط معكن
بتمنى ماتنسوا سوريا وأهلها بالاوقات الفضيله ربي يكتبلكم الاجر
الروابط المفضلة