السلام عليكم ورحمة الله وبركاته
حبيباتي
نبي نسألكم عن الفستق
من المعروف لو نبي اندير عجينة الفستق نطحنه كويس ونخلطه بماء ورد وسكر مرحي
فيه اللي يدير له بياض بيض ويدخله للفرن شوية
وفيه اللي لا
انا ماعمريش جربت كميات كبيرة للتخزين ديمة اندير اللي يستهلك وخلاص
بس لما ناخذ من السوق نتبنن نكهة قروصية (رغم ان تخزينه في الفريز )
والقروصية من الليمون اللي فيه يديوا فيه للتصبير ممكن
بس لما اخديت حلاوات بالفستق من تونس ما تغيريتش النكهة
السؤال
عجينة الفستق
باش نستخدمها كعابر او انديرها حشوة او اي شيء
كيف نتعامل معاها باش لو حبيت نحفظها فترة طويلة في الفريز ما تتغيرش؟
وهل فيه حد جرب التمر المحشي بالفستق المعجون بزيت الزيتون بدل مية الورد او لا نبي نعرف قداش مدة التخزين متاعه؟
وشكرااااا

اولا: اشكر اختي ام مريم العراق التي ارسلت لي الرابط

بارك الله فيها

ثانيا: حبيبتي عجينة الفستق مثلها مثل عجينة الفوندان و عجينة المرزيبان

تغلف كويس بالسلوفان ( النايلون اللاصق )

و توضع في حافظة حكمة الاغلاق

ثم تحفظ في الفريزر

بالنسبة للتمر المحشي بالفستق المعجون بزيت الزيتون ما جربته

اعرف التمر المحشي بعجينة الفستق التي ذكرتيها

الان انا حسألك

من وين خذيتي عجينة الفستق؟

في الغالب اندير فيها بروحي في الحوش
لكن لما نشري فيها واتية (كعابر) مش عجينة زي الفوندان تشريها او المارزيبان
تلقيها مشكلة زي الاناناسة او الصنوبرية او كعابر ...
مشكلة المحلات يبوا يصبروها فيضيفوا في الليمون أعتقد لهذا لما تاكليها تتبنني القروصية
عندي طريقة ببياض البيض ما جربتهاش
وانا ندير فيها بيور
فستق مرحي مع سكر ناعم وماء ورد
السكر حسب الحلاوة (المذاق)
وماء الورد اللي يلمها لك
جزاك الله خير ان شاء الله على كل اللي تريدي فيه لنا
بنسألك لو سؤالي لك شخصي ويضايقك ما تجاوبيش
انت من طرابلس؟
لاني نبي نعرف القوالب منين شريتيهم اللي تقطعي بيهم
انا نعرف محل واحد ومشيت له ما لقيتش حاجات حلوة فيه

حبيبتي شكرا على ردك
عجينة الفستق نعرف نديرها بروحي

سألتك نحسابك شاريتيها جاهزة

اني من طرابلس

القوالب خديتهم من محل في سوق الجمعة لقيته صدفة

و المحل سبق و ذكرت في الموضوع الخاص بالادوات انه اقفل

تشرفنا أختي العزيزة
و خسارة والله انه قفل
بارك الله فيك ياغالية
انا نعرف الدغري اللي جنب العويتي عنده قوالب بس مش حلوات هلبة
على كل بارك الله فيك وربي يحفظك ويحميك ان شاء الله لكل عين ترجيك

زنوبة يسعد مساك وجمعتك مباركة رانى زي الاطرش فى الزفة نبى فورميشن كامل تربحى