حبيباتى وقمراتى عندى ليكم طريقة للتشيز كيك تحفففففففففففففه انا عن نفسى كنت اشك ان اى تشيز كيك بيتى ممكن تبقى زى اللى بره بس دى بقى لما تعملوها هتدعولى
اسيبكم معاها احسن منا عماله ارغى كده
اولا:المقادير
150 جرام بسكوت {باكو بسكوت مارى للشاى او اى نوع }
50 جرام زبده
150 جرام جبنه قريش ملح خفيف{ودى بقى المفاجأه ارخص واحلى
من الجبنه الكريمه }
50 جرام زبادى
بشر ليمونه,عصير ليمونه,20 جرام جيلاتين
75جرام سكر
كيس كريم شانتيه
ثانيا:الطريقه
فالاول نحط الجبنه فى ميه من بالليل علشان تطرى معانا ان كانت ناشفه
والصبح نصفيها ونجهز باقى الحاجات،
ندوب الجيلاتين عالنار فى 100 جرام ميه ونسيبه يهدى شويه
نضرب الكريم شانتيه فى فنجان صغير من الميه
وبعدين نضيف السكر والزبادى والجيلاتين والزبده و الجبنه وبشر الليمونه وعصير الليمونه
نضرب بمضرب البيض لغايه ما تمتزج كل المقادير مع بعضها وتبقى كريمه
نطحن السكوت فى الكبه ونسيح زبده فى طاسه ونقلب فيها البسكوت 3 دقايق
نجهز صينيه ونغطيها بورق الومنيوم علشان تبقى ساهله فى خلع الكيك منها بعدين
وبعدين نفرش مطحون البسكوت بالزبده فى الصينيه ونفرده كويس وبالتساوى
وبعدين نضيف فوق البسكوت الخليط
اخر خطوه نضع الصينيه فى الفريزر 3 ساعات
وبعدين نطلعها ونسحبها بالراحه من الورقه وهتكون ساهله بس خلى ايدك خفيفه علشان متتكسرش منك
وده الشكل النهائى يا حلواااااااات
وده من فوق مصوراها بالطياره خخخخخخخخ
واحلى قطعة تشيز كيك يم يم يم
[CENTER]بألف هنا
وياريت متنسوش تدعولى ربنا يرزقنى الحمل هذا الشهر يا حلوات
الروابط المفضلة