بسم الله الرحمن الرحيم
مرحبا يا قمرات
يعني من أطيب الحلويات الشامية يلي ممكن تدوقوها المدلوقة
لا تقولوا دسمة و تقيلة
الواحد بياكل قطعة صغيرة مو لازم يطلع بالصينية ..
المهم
هي عبارة عن طبقتين
1-العجينة:
و نصنعها من فرك الكنافة
ما هو فرك الكنافة؟
نحضر عجينة الكنافة المعروفة و نفرمها بمفرمة اللحمة أو الخلاط لتصير ناعمة و متل العجينة ، لكن لسهولة العمل رح نعمل شي تاني بدل ما نجيب العجينة و نفرمها نصنع ما يشبهها..ماشي
2- طبقة القشطة و لازم تكون بلدية و أصلية و متل ما قالت لبنان منجيبها من الميدان
طيب و ما قدرنا نروح عالميدان ، شو نطلع بلا الأكلة؟؟!!
لا طبعا" رح نعمل كمان ما يشابهها في البيت.
و الآن تعالوا معي للمطبخ:
أولا" القشطة:
*نضع بالطنجرة 5 كاسات حليب و نغليها طبعا" هون ما بينفع نقول ريجيم و نستخدم حليب قليل الدسم ما بتظبط
* بس يغلي الحليب نضيف له 2-3 ملاعق خل أبيض أو نص ملعقة صغيرة ملح الليمون
ما تكتروا بتطلع القشطة حامضة و مو طيبة.
* ماذا سيحصل؟
رح يفرط الحليب يعني ينفصل الماء عن المادة الصلبة( و هي ما نريده)
نحن نسميها قريشة
لاحظتوا شو صار
نترك المزيج حتى يبرد و نصفيه بمنخل ناااااعم أوقطعة شاش
و نحصل على الآتي:
و لحتى تصير القشطة أطيب نخلط معها علبة قشطة نستلة
اذا ما عجبكن بلاها
ثانيا" العجينة:
المكونات:
كوب و نصف سميد
كوب طحين أبيض
كوب سكر
كوب و نصف سمنة أو زبدة
الأصل بيستخدموا سمن بلدي
(6-8) أكواب ماء+ماء ورد+ماء زهر
أنا استخدمت نصف هالمقادير لأنها كتيرة علينا
الطريقة:
نضع على النار وعاء و فيه الماء و السكر و لما يدوب السكر نضيف السمنة و ننتظر شوي لما تدوب.
لما تدوب السمنة نضيف السميد و الطحين و نحرك بسرعة لمنع التكتل
نستمر بالتحريك حتى نحصل على عجينة متماسكة
اذا لقيناها سميكة شوي نرجع و نضيف كاسة ماء
نمد العجينية في طبق التقديم و نتركها تبرد.
الآن نضع طبقة القشطة و يجب أن تكون سماكة القشطة بسماكة العجينة و لو أكتر معليش.
و أخيرا" و لاكتمال القيمة الغذائية نغطي الوجه بالفستق الحلبي المفروم
حطوا كتير
و طبعا" نكون عاملين القطر مسبقا" و كل واحد بيسكب القطر بطبقه حسب الرغبة
و هي القطعة لأحلى قمر
ان شاءالله بتبقوا سالمين
و كل عام و أنتم بخيييييييييير
الروابط المفضلة