●•° وصفة متميزه°•● رغيف كيكة الموز ..هشة وطرية ولذيييييييذة...بالصورة من عند لبنان!
السلام على أحلى صبايا
قبل ما أحط مقادير الكيكة هذه بدي بس قول إنو أي كيكة طبعاً يلي بيعطيها الهشاشة والطراوة هما البيض والزبدة أو أي دهون اخرى متل الزيت والمرجرين إلخ...
نصيحتي للذين بيعملوا ريجيم أو ما بيسوالهم السكر والدهون وكمان للأصحاء يلي بيحبوا ياكلوا أكل صحي وكمان يلي بيحبوا يدخلوا لولادهم الخضار والفاكهة لتتحول الكيكة من أكلة فاضية إلى طعام صحي أن يضيفوا الزبادي، الفاكهة أو الخضار بتعطي طراوة وهشاشة أروع وكمان صحية أكتر وكمان ما بتعوزي تحطي كتير سكر بالوصفة..الخضار والفاكهة متل (تفاح، جزر، تمر، موز، سبانخ، قرنبيط..) إي لا تستغربوا..أنا في كيكات كتير بضيف فيها الخضار يلي ما بتبين بالطعم ابداً بس بكون عم طعمي الأولاد خضار بالنهاية وبدون ما يحسوا ويتذمروا...أنا بصراحة ما نزلت هذه الوصفات عشان قلت لحالي يمكن ما تعجبكن الفكرة!!
اليوم الكيكة بالموز...زايد عندي موز وبدا يصير لونه غامق فعملته بالكيكة....فكرة حلوة عشان ما نرمي الموز المستوي زيادة..
كيكة بالموز
المقادير
كوب ونصف دقيق
ربع م ص قرفة وجوزة الطيب مسحوقين
نصف كوب سكر
نصف م ص فانيلا
م ص بيكتغ صودا
نصف كوب زيت نباتي
2 بيضة مخفوقة قليلاً
ثلث كوب لبن زبادي
ثلثين كوب موز ناضج مهروس
الطريقة
نحمي الفرن 180 درجة..
نضع الدقيق والصودا والفانيلا مع التوابل والزيت والسكر ونخفق بالخفاقة حتى يصبح المزيج ناعم ومفتت..
نضيف مزيج البيض واللبن والموز ويخفق لغاية ما يتجانس من دون زيادة في الخفق...
نصب المزيج في قالب (21*14*7 سنتم) مدهون أو أي قالب..بصراحة أنا لا أتقيد بالقوالب بس في كتير أخوات بيسالوني عن المقاس يلي مستعملته...نخبز مدة 40 دقيقة أو حسب الفرن عندك..المهم لما تشمي ريحة الكيكة تدخلي سكين أو عود خشب وإذا طلع نظيف يعني الكيكة استوت...
أترككم مع الصور
لما طلع من الفرن
بعد التزيين..بصراحة ما كان عندي وقت للتزيين..فشوية شوكولا وآيسنغ عالسريع وفوا بالغرضبتصدقوا ولادي ما بيحبوا التزيين؟ ما بيعودوا بياكلوا
ما شاء الله ولا قوة إلا بالله
بعد التقطيع
لذيذ فوق ما تتصوروا...
بالهنا والعافية ولا تنسوا أختكم أم آدم من دعواتكم....
رد مع الاستدلال
كتبت بواسطة تغريد2007
الروابط المفضلة