السلام عليكم ورحمة الله وبركاته ..

أخواتي .. كل عام وأنتم بخير .. والأمة الإسلامية .. أعادة الله علينا وعليكم بالخير واليمن والبركات..

إمبارح طول اليوم وأنا عم بشتغل بالحلويات .. يمكن شكلها ما يعجبكم بس الطعم على كيف كيفكم (مش غرور بس هاي الحقيقة) ..

إتفضلوا وشفوا..

هاد المعمول بتمر وفستق وجوز ..



وهاي غريبة ..



وهاد بيتي فور باللوز ..



وأخيراً بسكوت أم عبدالله & تالا .. فانيليا وشكولاته..



وبس .. هاي حلوياتي للعيد .. بدكم الطرق ولا بيكفو الصور.. ؟؟؟

أنا أول وحدة رح تضيفيني من حلو العيد لأني أول وحدة بترد تسلم ايديكي

ماشاء الله
روووعه
ننتظر الطرررق
ويعطيك العافيه

ام ايمونى ما شاء الله تبارك الرحمن رااااائع بمعنى الكلمة
بس ممكن قطعة واحدة انا عارفة انى تالت واحدة ترد
بس قطعة واحدة بس

المعمول بالتمر والفستق والجوز..



المقادير للعجينة:

5 أكواب طحين
5 أكواب سميد ناعم على الآخر
5 أكواب زبدة
2 ملعقة صغيرة محلب ناعم
1 كوب ماء دافئ
نص ملعقة كبيرة خميرة ناعمة
1 ملعقة كبيرة سكر
نص كوب ماء زهر
نص كوب ماء ورد
1 علبة صغيرة فانيليا بودرة
4 ملاعق كبيرة حليب بودرة

مقادير التمر:
التمر حسب الكمية اللي بحتاجيها معجون بزبدة وشوية قرفة وجوزة الطيب وفيه سمسم وحبة البركة ..

مقادير الفستق:
1 كوب فستف مفروم وسط + 1 ملعقة كبيرة سكر + شوية ماء ورد وأعجني فيهم الفستق

مقادير الجوز:
1 كوب جوز مفروم وسط + 1 ملعقة كبيرة سكر + رشة قرفة + شوية ماء ورد واعجني فيهم الجوز

لوجه المعمول (رشة السكر)
1 كوب سكر +1 ملعقة كبيرة فانيليا بودرة + 1 ملعقة صغيرة نشا (واطحنيهم جيداً حتى يصيرو ناعمين ع الآخر) وهاد سر معمولي !!! نكهة الفانيليا بتجنن والنشا بيخلي السكر يمسك ..


الطريقة :
أخلطي المقادير الثلاث الأولى جيداُ وغطيهم بكيس وأتركيهم لثاني يوم ..

في اليوم التاني أضيفي باقي المقادير تبع العجينة كلها .. وعلى طول اشتغلي فيها .. ولا تتركيها (ترى بتتخمر وبتنفش)
بلشي التمر وبعدين الفستق ثم الجوز وشكليهم بالقوالب زي ما تحبي وحطيهم بالفرن وبس يحمرو من تحت شوي حمريهم شوي من فوق وطلعيهم ورشي خلطة السكر عليهم عشات تمسك وأنا بصراحة بغمس حبة المعمول فيها مش رش على الوجه..

الغريبة ..



المقادير..
كوبان من الطحين المنخول
نص كوب سكر ناعم
كوب زبدة طرية
نص ملعقة صغيرة فانيليا
أنصاف من اللوز المقشور والمسلوق سلقة بسيطة عشان ما يسود لونه..

الطريقة ..

تخلط جميع المقادير السابقة ما عدا اللوز وتعجن جيداً باليد.. ثم تشكل على هيئة كرات ونضع في وسطها حبة اللوز ونضعها بالفرن حتى شوي يصير لونها على زهر من الأسفل (يعني ما يتغير اللون تبعها كتير) .. ثم تخرج من الفرن وتترك لتبرد ..

على فكرة بتطلع مقرمشة ومتماسكة ..

البيتي فور باللوز..



المقادير..
1 كوب زبدة طرية
1 ونص كوب طحين
1 ملعقة صغيرة بيكنج باودر
1 ملعقة صغيرة فانيليا
كوب سكر
1 بيضة
كوب أو ثلاثة أرباع لوز مسلوق ومطحون
نص ملعقة صغيرة جوزة الطيب ناعمة
ربع فنجان ماء ورد
ربع فنجان حليب سائل
كوب سكر للتزيين (نفس طريقة سكر المعمول)

الطريقة ..

تعجن جميع المقادير جيداُ مع بعضها ما عدا سكر التزيين ونفرد العجينة بالشوبك ويكون سمكها حوالي 1 سم أو شوي أسمك (حسب ما تحبو سماكتها) وشكلوها كمان زي ما تحبو أنا عملتها قلوب وهلال وتوضع بالفرن ( بس خلو مسافة بينهم لأنها بتنفش شوي) حتى تحمر قليلاً من الأسفل وحمريها شوي من الأعلى شوي بس وبعدين طلعيها من الفرن ورشيها بشوية ماء ورد وغمسيها بالسكر .. وخليها تبرد ..

بسكويت النجوم بالفانيليا والشكولاته ..



هاي طريقة أم عبدالله & تالا جزاها الله كل خير .. بس أنا عملتها بقوالب نجوم حجم كبير وأصغر وبدلت الألون .. زي الصورة..

وهاد الرابط

http://www.lakii.com/vb/showthread.php?t=204554

كتبت بواسطة Rino

أنا أول وحدة رح تضيفيني من حلو العيد لأني أول وحدة بترد تسلم ايديكي

أكيد ولو .. وأسعدني أنك أول وحدة شافت موضوعي .. وربي يسلمك ويعيد العيد عليكم ..

كتبت بواسطة .. Rahf ..

ماشاء الله
روووعه
ننتظر الطرررق
ويعطيك العافيه

الله يعافيك عزيزتي .. والطرق نزلتها وصارت بين إيديك .. وعلى المطبخ ركض للتطبيق