السلام عليكم أخواتي الحبيبات .. هاي اللنك لموضوعي للي مو عارف قصتي ..
http://www.lakii.com/vb/showthread.php?t=820414
الحمدلله يارب على كل حال كانت فترة صعبه جداً الله لا يكتبها على مسلمه أبداً وما زالت الله المستعان .. ومافي شي يثبت الانسان في هيك محن إلا الايمان بالله وانو سبحانه كل ما يكتبه ويقدر لنا هو الخير النا وان كنا نجهل الحكمة في وقتها .. لا أخفيكم أخواتي طول الفترة اللي فاتت ولحد الآن وانا حاسه إني بحلم أو أني بحضر فيلم صاير مع وحده تانيه غيري ولما بتمر عليه لحظات أعي فيها تماماً حالي ووحدتي فبنهار بالبكاء وأضطر أن أخفي بكائي عن أهلي حتى لا أزيد حزنهم وعذابهم. الحمدلله رجعت للعيش مع أهلي ولغيت فكرة الغربه لأنها كانت فكره مجنونه خطرتلي في عز المشكله كنت مفكره انو ببقائي بالغربه راح أغيظه أو لأثبت لنفسي أني قويه و لست بحاجته ولكن بمجرد حدوث الطلاق حسيت ان في بقائي بالغربه ما راح يتضرر حد إلا أنا وحسيت بالوحشه والوحده و أني محتاجه أكون مع أهلي أتونس فيهم وحتى أهون عليهم هول اللي صار ولا أقلقهم علي والأهم من هادا كله طبعاً رضا الله فلا يجوز البقاء من غير محرم وبالذات في بلاد الغربه الموحشه .. والحمدلله من ثاني شهر لقيت شغل وبمرتب جيد سبحان الله من غير ما أقدمله جاءني عن طريق أقرباء ومديري انسان جداً محترم وهالشغل هون عليه كتير لانو شغل تفكيري شوي بدل الوحده والفراغ، رغم اني بعد الطلاق اهتزت ثقتي بنفسي جداً كان احساس بالفشل فظيع واني لا أتمتع بأي مميزات ولا قيمة لي ولا أستطيع أن أكمل حياتي زي باقي الناس .. حتى استغربت انو مديري وافق يشغلني لاني بالمقابله كان واضح اني مهزوزه وكل ما يسألني شي أقوله كنت بعرف أعمل هيك ومع الوقت ممكن أتذكر لاني صارلي فتره كبيره تاركه الشغل!!!! بس هو لما شاف ال CV اتأكد انو اللي عنده خبرة هالسنين أكيد بيعرف وسبحان الله كلها تساهيل رب العالمين. وسجلت كمان في مركز لحفظ القرآن الحمدلله وسعادتي بهالمركز لا توصف فيه أخوات (بمثل أخلاقكن أخواتي في منتدى لك) حبوني وحبيتهم بدون ما نعرف شي عن تفاصيل حياة بعض سبحان الله هاي هيه المحبه في الله وما بلاقيها الانسان الا مع اللي بجتمع معاهم على طاعة الله وأول يوم لي في المركز حسيت كأنو حد كان بعدني عن ربنا وربنا رجعني ليه الحمدلله .. ونفس اليوم قابلت وحده كنت بعرفها من زمان لقيتها حزينه بسألها عن السبب؟ قالت زوجها طلقها بعد ٣٠ سنه عشان ما عندهم أولاد مع أن المشكله منه وتزوج وحده مطلقه وعندها ولدين على أمل ينجب وقالها لو كنتي متأكده انك سليمه كنت تركتيني من زمان!!! مسكينه هيه كبيره بالعمر هلا ومريضه وأهلها متوفيينحمدت ربنا من كل قلبي على حالي اني لسه بصحتي وأهلي معي وانو الطلاق صار بهالسرعه بدل ما يضيع العمر أكتر مع من لا يستحق .. الحمدلله يارب على ما قدرت وقضيت .. معلش أخواتي طولت عليكم بس كنت محتاجه أفضفضلكم وأقولكم أخباري زي ما شاركتكم معي بمشكلتي بحب أشارككم كمان بالفرج منها خطوه بخطوه .. الله يبارك فيكم كلكم .. لا تنسوني من دعواتكم .. أحبكم في الله
رد مع الاستدلال
اللهم لك الحمد لجلال وجهك و عظيم سلطانك 
الروابط المفضلة