تويت
مشاركتي في مسابقة انا والحمل وزوجي
صباح|مساء الخير عليكم جميعاً حبيباتي :
من اول ماشفت اعلان المسابقة لفتتني الحقيقة وحبيت اني اشارك فيها واقرأ مشاركات البنات
لأنه الحقيقة كل وحدة فينا لها شخصيتها المستقلة ولكن الموضوع واحد
فمن الجميل انه الوحدة فينا تطلع على تصرفات الأخرين في الموضوعات الحياتية القيمة
وخصوصا لو كان عن موضوع حساس ومهم زي الحمل(عسى الله ان يرزق كل من تبي ولا يحرمها يارب)
انا طبعا راح احكيلكم على تجاربي في الحمل :
الحمدلله مافي مواقف اجتني من زوجي بس المواقف اللي تعرضتلها بالحمل كلها كانت بسبب نفسيتي
في حملي الأول استسلمت للأكتأب بسبب التغييرات اللي صارت بجسمي وبسبب اني ما اقدر لا اصبغ شعري ولا اشقر حواجبي من شان سلامة البيبي
فصرت بصراحة اكره نفسي وماحاولت اني اصلح من هذا الموضوع وزوجي تحملني والحمدلله ربي يحفظه رغم اهمالي الكبير في شكلي
(مهتمة بنظافتي لأني من النوع الموسوسة في النظافة وكذلك نظافة بيتي ) لكن كملابش وكشعر ومكياج ابدا لا (لأني كنت احس اني لو مهما سويت راح اطلع غولة(مو زينة)
المهم طبعا طول فترة حملي اللي يقولي تعالي اصورك او ايش رايك نتصور مع بعض ؟
اصرخ فيهم واقولهم لالالالالالالالالالالالالالالالالالالالالالالالا ارجوكم لا
وطبعا اللي صار انه زوجي صورني من غير ما ادري (عشان تقعد ذكرى)
بعد ما جبت ابني والحمدلله اهتميت بأكلي وصحتي ورياضتي ورجع جسمي الحمدلله بشكل نوعا ما معقول
جاني زوجي وقالي تعالي افرجيك مفاجأة وفرجاني الصورة وعينكم ماتشوف الا النور
والله اني بكيت على شكلي وتأسفت من زوجي وقلتله سامحني اني كنت مقصرة في حقك
هو قعد يضحك وقالي لا عادي وهذا الحمل معروف انه بيغير من جسم وشكل ونفسية المرأة (المهم كان معتبر الموضوع عادي )
اما انا قعدت الصورة في راسي وقلت في نفسي بعون الله الحمل الجاي ماراح اسيب نفسي واستسلم للكأبة
الحمدلله وربي رزقني بالحمل التاني رغم اني ماكنت عاملة حسابه لكنكله نعمة من عند الله ويجب الحمد عليها فالحمدلله
من اول ماحملت اول شي سويته رحت اشتريت لبس بيت بس انيق وحلو وملابس نوم تجنن وملابس داخلية حلوة
و اشتريت مكياج وروائح جديدة رغم انه عندي ولكن قلت لا اجدد وزيادة الخير خيرين والحمدلله
وبديت اهتم بنفسي واجمل نفسي اكثر من الأيام العادية انا زوجي مايحب الميكاب
بس بيحب اللمسات الخفيفة زي الأيلاين والكحل والمسكرا واحمر الخدود الخفيف بس
فبديت كل يوم البس لبس شكل واتزينله وغيرت قصت شعري
بس طبعا الصيغ ماصبغت من شان سلامة البيبي بعون الله
والحمدلله هذا اثر ايجابيا فيني وفي زوجي ولله الحمدل (رغم انه عمره ما اشتكالي )بس واضح عليه انه مبسوط والله اعلم
اما بالنسبة للطبخ ونظافة المنزل هذي من اساسيات اهتماماتي ومستحيل اتنازل عنها الا لو كنت مريضة بشكل كبير
وايضا ركزت على ابني البكر وحاولت اني ما اهمله وزاد اهتمامي بيه اكثر واكثر وبكلمه عن البيبي وبقوله
البيبي بيحبك كثير وبينتظر امتى يجي ويلعب معاك , والحقيقة في الأول حسيت انه متضايق بس بعدين مع كثر كلامي عن البيبي ابتدأ يسألني : متى يجي البيبي؟
الحمدلله
الغلطة اللي غلطتها في حملي الأول اني كنت اكل كثير اللي يسوى واللي مايسوى
وخصوصا الأشياء اللي مافيها فايدة زي الشيبس والمشروبات الغازية والشكولاته والحلويات
وكان على بالي اني لازم اكل من شان البيبي مايطلع ضعيف
وهذي الملعومة غلط في غلط , انا وزني زاد والبيبي الأول جبته في وزن ال 3 كيلو وانا كنت طامعة في اكثر ^_^
المهم في البيبي التاني ماكررت نفس الغلط حاولت اهتم بأكلي
,ما اكذب عليكم واقول اني ما اشرب غازي او اكل شكولاته اشرب واكل بس بأعتدال
بس مركزة على طعام الصحي وعدم الأكل بكميات كبيرة
هذي تجربتي ويارب تستفيدوا منها
انا غلطت وتعلمت من غلطي وحبيت افيدكم عشان ماتسووا الغلط مثلي
نصيحتي :
ماتكرهي شكلك لأنه هذا شيئ طبيعي وبعون الله بالمحافظة بعد الولادة والرياضة والأكل الصحي راح تصيرين احلى
ماتقصري في حق زوجك واهتمي بشكلك ونظافتك ونظافة بيتك (لأنه للأسف في بعض الأزواج مابيعرف انه هذا شي طبيعي وبيعتبره دلع ستات مش اكثر*)
اذا عندك اولاد ماتقصري في اللعب معاهم ونظافتهم والأهتمام بيهم (هما مالهم ذنب وماتخليهم يكرهوا البييبي اللي جاي بسبب عصبيتك الزايدة )
المشي في الأماكن الطبيعية مريح للأعصاب تمشي مرة مرة عشان تفرغي الشحنة الزايدة
وتمتعي بالحمل بكل لحظاته لأنه ايام وبتروح وماتقعد الا ذكرى فخليها ذكرى طيبة
يارب عجبتكم تجربتي وعقبال كل من تبي تحمل ربي يرزقها
وكل حامل الله يسهل عليها وتقوم بالسلامة هي والبيبي
دعواتكم اخواتي ربي يسهل علي واشوف البيبي سليم معافى
تعليق