السلام عليكم ورحمة الله وبركاته
من فضلكم لو كل وحدة تكتب لنا رايها في شباب ورجال ليبيا.
عن نفسي افضل ان اسمع ارائكن علي اكون مخطئة او ظالمة فاعود بها الى صوابي، ولكن هل منكن من ترى مثلي بأن الشاب الليبي بات لايعرف شيئا عن المرأة، الزواج الحب، لاينظر الى الحياة نظرة سليمة، بات مخلوقا عديم الثقافة، اهتم بالقيل والقال واللغو اكثر من اهتمامه باكتساب صفات وميزات تؤهله للعيش اسوة بأقرانه بالخارج، ليس كل شباب بلدي سواء ولكن السواد الاعظم منهم صار مهمشا معتمدا على المرأة في حياته بشكل لايوصف.

اخواتي احب بلدي واهلها ولكن اسفي على شباتبها عميق عميق وآمل ان نتبادل الرأي في هدا الموضوع عل الله يجعل لنا منه مخرجا.

شكرا لكم

والله يا رفيدة انتي صادقة ميه في الميه ، قليل قليل جدا تلقي شاب مثقف ،قصدي ثقافة اجتماعية وكيف يمكن انه يكون افضل خليها الثقافة العامة متع الحياة بروحها ، بالعكس اني ملاحظة ان الشاب ديما عنده غرور ويشوف روحه الافضل مع انه العكس ، ولان الطبيعة في بلادنا عطاته حقوق اكتر من اللي يستحقه هذاك علاش شايف روحه احسن من البنت وصدقيني في داخله شعور بالنقص حاسس انه راجل ومش قادر يدير شي من اللي تدير فيه البنت خصوصا لو شاف بنات قراب ليه خير منه في الوظيفة او الدارسة ،وهذا الشعور يخليه يتصرف تصرفات غير مقبولة اجتماعيا واخلاقيا طبعا تختلف من شخص لاخر حسب التربية والمستوى الاجتماعي والتعليمي ،لكن العموم اكترهم اكترهم عندهم شعور بالنقص بجديات ،لكن طبعا منقدروش نقولو كلهم لان لكل قاعدة شواذ،والشواذ عندنا هما الشباب المفكر والمثقف واكيد في حياتك انتي قابلتي هالقلة من هادو الشباب،وعالعموم الحمد لله على كل حال وانشالله الامل في الشباب اللي يطلعو منا ، وانشالله يولو الشواذ عندنا هما السلبيين قولي امين،وعلى فكرة اني معرفتش انتي هل متزوجة او لا ؟ كانك مش متزوجة انشالله ربي يبعتلك ولد الحلال اللي من الشواذ حالياً ، وعجبني طرحك للموضوع والله انشالله نكونو صحبة صالحة، واهم شيء خلي عندك امل ومتخليش نظرتك محصورة على هادي السلبيات واكيد كل انسان منا عنده سلبيات وايجابيات وجتى هادو الاشخاص السلبيين اكيد عندهم ايجابيات ، وانشالله فهمتي حاجة من كلامي لاني نكتب ومستعجلة ... ولكي مني اجمل التحيات

حلو موضوعك هلبه
الشباب والبنات الفتره هذه سبحان الله الواحد معاش يعرف شن اقول لانه تفكير الولد والبنت اصبح هايف هلبه يعني اصبح من النادر انه تلقي ولد في العشرين يعرف المسولية والبنت كل همها الحب والدوه هذه واللبس والمكياج والسياره وفي بنات واولاد كويسين بس المشكله في الاغلبية او هذه الصورة الواضحه عليهم

السلام عليكم كيف الحال شن اخباركم ان شاء الله كويسين
تبو الصراحة و اللهي موضوعكم كويس وبصراحة تانية البنات بدو مشاء الله عليهم بدات بعد النقالات و يلي زايد الطين بله هوة التفكير يلي يفكرو فيه و اللهي الواحد معاش عرف شني بيدير
مفيش حاجة اسماها المسؤولية و لا الواحد يفكر قبل ميدير اي شي لكن شنو بنديروا ربي يهدي ان شاااااء الله