كان ياماكان مايحلى الكلام
الا بذكر الله الحنان المنان
والصلاة والسلام على خير الانام
ياساده ياكرا م
كان فى سالف العصر والان
شاب طيب قلبه كله تقوى وايمان
طول ماهو ماشى بيرتل ايات من القران
ابن حلال وطيب بس فى عرض الدنيا فقير غلبان
على اد حاله بس فى رضا ربه طمعان
اسم الشاب عمار
وكانت مهنته الى ورثها عن ابوه
فحت الابار

اهل البلد بيستبشروا بيه وبوجه الجميل
وطيبته وكلامه البلسم الى يريح العليل
اذا فحت بير الماء بيتدفق منه الماء شلال
علشان قلبه موصول بالله وبن حلال
والميه كانها متحليه بالسكر وريحتها فل وزعفران
اسمه المشهور بيه فى البلد
عمار البيار
مرت عليه الايام الشغل واقف والحال مش على مايرام
البلد مالها .........محدش بيفحت بير لمزرعته ولا فى بيته
عمار عارف ان الرزق بيحب الخفيه
لو نام فى بيته محدش هيسأل عليه
اخد عدته وقال توكلت عليك يامالك الملك والملكوت
انا لو جلست فى بينى اكيد هموت
راح فى مكان بعيد عن بلده
مكان بتمر فيه القوافل وقال افحت بير
وابيع الماء للرايح والى جاى
وقال يارب الرزق الى هيجيلى من البير
نصه ليك يارب ونصه ليه
نصه للغلابه والمسكين
ونص انوى بيه الستر واشوف بنت الحلال
دى كانت نيته
والانسان اذا صدق مع الله حقق ليه امنيته

عمله خيمه لان الشغل هيخد شهور
وسمى بسم الله وجلس على مكان
وجلس يقرأ القران ويذكر الله ويدعى الله
ان يرزقه ويوسع عليه ويعفه بالحلال

عمار مسك فاسه وسمى باسم الله
ياااه ياعمار
مالك ياعمار الارض مالها صخر وقاسيه فى الحفر
عمار جلس حزين مكسور الخاطر
يحاسب نفسه
ليه المره الى نويت فيها خير
يطلعلى صخر وحجاره
اه على طعم الخساره
كلها خيبه ومراره

عمار جلس يحاسب نفسه اكيد ربنا زعلان منى
انا اكيد عملت ذنب اغضب ربى منى
لاء حسدنى حد لاء......انا محسود
جلس يستغفر ربنا ويتوب اليه

عايز يمشى من المكان ويشوف مكان تانى
بس فيه حاجه جواه بتقوله اصبر
وكمل حفر المسكين كمل وكمل
حفر يجى خمس امتار
كان ينحت فى الصخر اتريها صخره كبيره
ولما انتهى من كسرها

يااااه على الى وجده تحتها
صندوق كبير مرصع بالذهب والماس
فيه كنوز ملك ولا سلطان ذهب ويقوت ومرجان
ورساله الى اول من يصل للصندوق
ومصحف بخط الايد
بكره نكمل
حكايه عمار البيار
الى بيفحت الابيار
ايه الرساله وايه الى فيها
وايه حكايه المصحف
وهل ده لقطه طريق يقدر يخدها

خلينا نكمل بكره الحكايه
ونشوف هتوصل لايه فى النهايه
ونشوف هنتعلم ايه من الحدوته والروايه

توتوا توتا
يارب تعجبكم الحدوته
واقولكم تصبحوا على خير
بحبكم فى الله
ياكل من تتابعونا
على فكره انتم ناس زى العسل

وبشكر لكم مروركم ومتابعتكم
حتى لو ما علقتم او ماعملتم اعجاب
المهم توصل رسالتى
فانا اتعلم منكم
وانا مجرد خادم وفلاح فى بستان الاحبة فى الله
فان اخطأت ولم تنصحونى
سأحاججكم امام الله
فالدين النصيحه
فلاتبخلوا علينا بتوجيه او نصيحه

تقبلوا تحياتى