انتقلت منتديات لكِ النسائية إلى هذا الرابط:
منتديات لكِ النسائية
هذا المنتدى للقراءة فقط.


للبحث في شبكة لكِ النسائية:
الصفحة 62 من 249 الأولىالأولى ... 125258596061626364656672112162 ... الأخيرالأخير
عرض النتائج 611 الى 620 من 2485

الموضوع: مدارس مدارس............الجزء الرابع

  1. #611
    تاريخ التسجيل
    Feb 2006
    الردود
    2,487
    الجنس
    أنثى
    lolowation
    واللة عندك حق هو دة فعلا اللى بيحصل فى اغلب المدارس الاهمال
    وانا كمان حصل معاى اغلب المواقف اللى انت حكتيها الجاكيت طبعا راح
    وروحت واشتكيت قالولى مش هنقدر نقلع160 طالب فى الكيجيهات علشان ندور على جاكيت ابنك
    اللى مكتوب علية اسمة
    الصراحة المدرسات كويسين لكن المشرفات اخر اهمال وهما اللى بيكونوا معاهم اغلب الوقت فى البريك
    وقبل ما يروح اخر اهمال واسؤا معاملة للاطفال اللى المفروض انهم يحببوهم فى المدرسة
    لكن على فكرة دة حال اغلب المدارس الا القليل اللى ما سمعتش عنة اصلا وما اعرفوش
    لكن المشكلة ان الواحد عاوز مستوى كويس لاولادة لكن هنعمل اية ما هى الحياة صعبة بردة
    علشان تدخلى واحد ب25الف وما خفى كان اعظم اومال لو لية اخين كمان هتعملى اية
    المشكلة انها معادلة صعبة مش ممكن تتحقق ابدا اذا بقى ربنا رحمنا وانصلح حال البلد كلة
    وبقى فى ضمير وكل واحد يعمل عملة ويتقنة زى ما امرنا ربنا
    وفعلا زى ما انت قلتى وانا بدور على مدرسة كويسة كلة قالى كدة بردة
    اهم شئ الجامعة اللى تقعدى تصرفية فى مدارس غالية شيلى هولة يدخل جامعة
    محترمة وخلاص هو دة اللى هيكون عنوانة مش كان فى مدرسة اية
    واللة الواحد مش عارف يعمل اية انا زهقت وقررت انى اقبل بالامر الواقع
    ادام مش فى استطاعتى انى اودية مدرسة فيها جميع المواصفات اللى بتمناها
    لان طبعا سعرها هيكون غالى جدا يبقى لا يكلف اللة نفسا الا وسعها
    وربنا يصلح الحال ويهدى القائمين على التعليم فى مصر اللى اصبح فى اسؤا حالاتة
    اظن انة مش هيبقى اسؤا من كدة
    وربنا يتولانا برحمتة

  2. #612
    تاريخ التسجيل
    Nov 2005
    الموقع
    cairo
    الردود
    134
    الجنس
    امرأة
    زقزوقة وزقزوق انتى كمان وحشتينى ياقمر
    حفر الباطن على ناصية المصرية الدولية فى شارع ورا نفق اللبينى اسمه متهيالى شارع المجزر وفى نفس المنطقة الاورمان اكاديمى وعلى اللبينى من بره سقارة
    تعتبر اصلا المنطقة دى تجمع كبير للمدارس الى فى حدود ال4000
    انتى وصلتى لحاجة
    مش عارفة الاهرامات كتير بيشكروا وكتير بيقولوا انها مدرسة حركات يعنى بيهتموا بالحركات على حساب التعليم وبعدين انا هادخل 2 فحاسة ان كده المصاريف هتعدى مش عارفة اعمل ايه خالص
    انا على فكرة كل شوية احتار اكتر
    ربنا يهدينا جميعا للاصلح للولاد ان شاء الله

  3. #613
    تاريخ التسجيل
    Dec 2004
    الموقع
    مصر
    الردود
    28
    الجنس
    امرأة
    lolowation زي ما قالتلك ام مغرم معظم الحاجات ديه بتحصل في كل المدارس حتي الانترناشونال
    المشكلة مشكلة ضمير مش مشكلة مدرسة
    وندعي ربنا يوفقنا في مدرسة المدرسين فيها عندهم ضمير

  4. #614
    تاريخ التسجيل
    Apr 2009
    الردود
    123
    الجنس
    امرأة
    بسم الله الرحمن الرحيم

    عزيزتي أم مغرم وعزيزتي سالي

    انا عارفة إن الإهمال سمة من سمات الشعب المصري اللي أنا منهم

    بس صدقيني إبني إبتدى في حضانة إنترناشونال تحت أيدي إدارة مصرية أجنبية

    وعمر ما شفت خلال السنة اللي قعدها التهريج دا

    ده كمان ساعتها إبني كان بيروح بلبس من البيت مش يونيفورم
    وعمر ما حاجة ضاعت ولا اتسرقت

    كمان مرة أفتكر اتعور وأخدوه وودوه العيادة وكلموني في التلفون قبل ما اروح أخده يطمنوني

    خلينا نقول كلمة الحق

    في فرق كبير وحتى إن كان في إهمال فعمره ما حيكون زي التاني

    وبجد حرام أوي عشان أطلب خدمة أدمية من مدرسة تبقى مستحيلة إلا لو حروح مدرسة غالية قوي

    إنت عارفة يا سالي ويا أم مغرم

    روحي الفيس بوك كده وابحثي عن المدارس الغالية دي شوفي أولياء الأمور عاملين إيه

    عاملين جروب كلهم بيجتمعوا فيه عشان يشوفوا ايه الأشياء اللي مش عجباهم فيبقوا كلهم كيان واحد وقوة ضد المدرسة

    ساعتها المدرسة تبقى تحت أمرهم لأنهم مجتمعين على رأي واحد

    مش واحدة تتكلم وبس ويقولولها اللي مش عاجبه مع الف سلامة زي اللي حصل معايا في رويال
    لأن الإدارة عرفت إني مش راضية وعرفت إني مش حسجل لإبني السنة الجية تفتكري عملت إيه ولا حاجة

    دول بيقولولي إحنا ويتنج لست

    بياخدوا أعداد كثيرة على حساب الكواليتي وعلى حساب الكفائة
    كثر في العدد وأكسب وطز في اللي مش عجبه

    العيب ساعتها مش على الإدارة العيب على الأهل اللي بيدفعوا وهما متضررين

    وبعدين أنا مش طالبة مدرسة خالية من العيوب لأن ده عمره ما حيحصل في مصر
    أنا طالبة إني لما اعمل توازن بين العيوب والمزايا ألاقي المزايا تعلو على الأقل

    لكن لا مزايا وعيوب كثيرة وضرر نفسي وجسدي على إبني ومستوى نازل في الحضيض

    يبقى ربنا حيحاسبني على الفلوس دي والله


    (فكروني أنزلكم عناوين ويب سايت مفيدة أوي لأولادكم في التعليم المنزلي ) والله حتدعولي حتحسوا إن أولادكم مبسوطين وبيتعلموا في نفس الوقت

    أنا عن نفسي عمري من ساعة ما دخلت إبني رويال ما اعتمدت عليها لأن المنهج كان بودي أخده كله فقعدت في البيت أعلمه القراية والكتابة واقراله قصص وازودله كلمات عشان ينمي بيها لغته
    لكن اعلم من هنا ويروح المدرسة يرجعلي بألفاظ غريبة من زمايله وحركات اغرب


    الحمد لله

    على فكره أنا لو صاحبة مدرسة عمري ما حعمل انترفيو للولد أنا حعمل انترفيو للأب والأم

    لأن التربية عندي أهم كثير من الشطارة

    وبعدين مهو طبيعي الطفل يجيني بليد وأنا أغيره وأخليه شاطر أمال فايديتي ساعتها إيه

    لكن لما تكوني في مدرسة الولاد أخلاقهم في الحضيض وبيتعاملوا بالجزم وبألفاظ غريبة أكيد بيسمعها من باباه ومامته
    ولا لما تلاقي طفل بياكل بطريقة غريبة والله كل ده من الأب والأم الطفل عجينة يشكل كما يربى

    وده رأي ومقتنعة بيه جدا

    ولا اقول إلا الحمد لله ويارب يقدرني على الخير لإبني لأن كل ما بشوف عينه وهيا وارمه بقول
    حسبي الله ونعم الوكيل في الإهمال

    دمتم

  5. #615
    تاريخ التسجيل
    Feb 2006
    الردود
    2,487
    الجنس
    أنثى
    الف سلامة علية وربنا يبارك لك فية يارب وينتقم من المشرفات اللى ما بيراعوش ربنا فى شغلهم
    ومستنين منك المواقع اللى انت قلتى عليها واضح انك ام واعية ومثقفة ونحب نستفيد منك ونستغلك هههههه
    وبالنسبة للاخلاق بقى حدثى ولا حرج مع ان المفروض ان المدارس دى تكون بتضم مستوى اجتماعى واخلاقى معين
    انا مش قصدى الغنى او الفقر الغنى غنى باخلاقة وتعاليمة لكن انا ابنى بيجى يقول كلام غريب ما اعرفش بيجيبة منبن
    من زمايلة اللى مش عارفة هو احنا حالة شاذة ان احنا عاوزين وبنحاول على اد ما نقدر نربى ولادنا كويس اومال
    الاهالى دى بيعملوا اية فى البيت مش عارفة
    واللة فى يوم جاى يقولى ماما قولى شكوش وانا عادى بسذاجة قولتلة شكوش قالى شعرك منكوش قلت لة ميم علمك كدة قالى
    صاحبى فى المدرسة قولت لة لا بلاش كدة قالى وبطفولة عادى كانة بيلعب طب خلاص سورى طب اخر مرة
    قولى مصاصة قولت لة قالى امك رقاصة صرخت فى وشة وحرمتة من المصروف يومين وكلمت الميس بتاعتة
    علشان يخلوا بالهم شوى مع الاولاد ومن اسلوب حوارهم مع بعض لكن قالت لى وبقمة الاستهتار
    طب احنا هنعمل اية هنراقبهم ونسجل لهم ونعرف هما بيقولو اية لبعض وهما فى البريك
    ما عرفتش ارد عليها اتصدمت من الاستهتار فعلا دى مشكلة فى اولاد مع ابنى فى الفصل على فكرة
    هو فى كى جى وان يعنى لسة ما طلعوش من البيضة ومش قادرة اقولك الولاد بينفسنوا على بعض
    كان فى ولد صحبة كل ما اروح يقولى يا طنط مغرم وحش وشقى وضربنى اقولة معلش حقك على هقبهولك بعد كدة
    يا طنط مغرم كسرى المسطرة يا طنط يا طنط لما زهقنى اخر مرة صدمنى قالى يا طنط مغرم بيعمل حاجات وحشة فى الكلاس
    قولت لة اية قالى بيقوم من الكرسة بتاعة وبيجرى فى الكلاس
    قولت لة معلش بقول لابنى هو مالة على لية دايما يشتكى منك يقولى اية تخيلى يقولى اصلى لما مش بديلة سويت
    بيروح يفتن على كل شوى عند الميس ويقول للعيال اللى مش هيدينى حاجة حلوة هقول للميس علية
    تخيلى دى عقلية طفل بيبتز زمايلة واللة فعلا عندك حق المفروض الانترفيو تتعمل للاهل مش للطفل
    واللة انا فكرت انى انقلة تجريبى ما هى كدة كدة الاهمال والتسيب ورانا ورانا يبقى ندفع اقل بقى بدل
    ما نشترى الاهمال بالفلوس
    على فكرة انا ابنى كمان كان مبطوح فى عينة ولد حدفة بالكتاب زرقلة عينة كانة واخد بنية فى الملاكمة
    ولتخليد الذكرى كان ميعاد الصور تانى يوم ولما جاتلى الصور والزرقان تحت العين باين
    كلمت الميس قالت لى معلش ما هم شقاى هنعمل اية
    قولى لى والنبى اقولها اية عندهم برود ولا مبالاة فظيعة
    ربنا يستر على اللى جاى مستنين المواقع ما تنسيش
    وجزاك اللة خير

  6. #616
    تاريخ التسجيل
    Jan 2008
    الموقع
    egypt
    الردود
    21
    الجنس
    امرأة
    تعقيب كتبت بواسطة أم جورى;

    [SIZE=5
    حد بقى يعرف مانور هاوس وبيفرى هيلز مصروفاتهم كام ومستواهم ايه[/SIZE]
    برايميري1 في المانور 7400 من غير باص
    بيفيرلي 6500 من غير باص
    بس بيفيرلي وايتينج

  7. #617
    تاريخ التسجيل
    Jan 2008
    الموقع
    egypt
    الردود
    21
    الجنس
    امرأة
    انا خلاص تعبت من التفكير
    دلوقت بيفيرلي وايتينج او يمكن يكونو قفلو زي ما ياسمين 10 قالت بس هل قفل لبرايميري 1؟
    ما قداميش غي مانور بس مشكلتها الكم في الفصل 25_30
    ساعدوني

  8. #618
    تاريخ التسجيل
    Apr 2009
    الموقع
    بيتى هو حياتى
    الردود
    3,718
    الجنس
    امرأة
    تعقيب كتبت بواسطة om sondos عرض الرد
    انا اشتركت فى المنتدى مخصوص عشان اشارك معاكم يا اجمل امهات فى الموضوع المهم ده
    اناعندى بنوتى هتدخلkg1 ودخت من كتر اللف عالمدارس وهحكلكم عملت ايه
    عجبتنى دايموند اللى خلف كايرو مول لانها قريبه ونظيفة وبيحفظوا قران ولاكن مدرسه بتشتغل فيها قالتلى انها مش حلوه والادارة وحشة وغالية على الفاضى
    رحت رويل اكاديمى حسيت انى دخلة نادى وحسيت الطلبةfree
    رحت الحياة مستريحتش لملعبها الرملى بالرغم انها مدرسة جديدة
    عجبنى شكل جينيس وخصوصا الجاردن بتاع الkgs بس قالولى انه جت ادارة جديدة وحشة
    وعجبتنى الواحة بس انتوا فى المنتدى قلتوا انها نص نص بس لسه بفكر فيها
    وجلوبل قالولى انهم قفلوا التقديم
    وبفكر فى الامجاداللى فى المعادى بس بعيده ويمكن يكونوا قفلوا التقديم
    خبرونى بالله عليكم ماذا تفعلوا لو كنتم مكانى
    اهلا بيكى فى المنتدى
    لو دورتى فى الردود صفحة 60 هتعرفى رايى فى دياموند
    ورويال فعلا نادى مش مدرسة

    من الواضح من اللى سمعته عن المدارس ان جينيس فيها مميزات كتير جدا
    بس للاسف الادارة السنة دى بوظت سمعة المدرسة وسيئة جدا
    مش عارفة هقدر استحملهم السنة الجاية ولا انقل الولاد
    وخايفة انقلهم واكيد برضه هلاقى مشاكل لان مفيش مدرسة برفكت 100 فى ا100

    ده انا صاحبتى نقلت من جينيس السنة اللى فاتت وراحت فيكتوريا كولدج اللى فى طريق مصر اسكندرية مصاريفها حوالى 10 الاف وشوية وكلمتها لقيتها بتشتكيلى من مدرسة الانجلش انها مش كويسة تخيلوا
    يعنى المدارس كلها مشاكل
    هى بتفرق بأة فى النطق ومستوى المعاملة زى الأخت لولو ما قالت

  9. #619
    تاريخ التسجيل
    Apr 2009
    الموقع
    بيتى هو حياتى
    الردود
    3,718
    الجنس
    امرأة
    [quote=lolowation;7922885]
    بسم الله الرحمن الرحيم

    أحب أعرفكم بيا

    أنا د: لولو معيدة بكلية الصيدلة وإن شاء الله حناقش الماجستير قريب إدعولي

    أنا أم لطفل لديه 4 سنوات و4 أشهر وهو الأن في كي جي 1


    وساحكي قصتي بالكامل لأضيف خبرتي لكم

    أنا دخلت إبني وهو 3 سنوات heritage nursery
    ودي في 6 أكتوبر لأني ساكنة في دريم لاند فدي تعتبر قريبة مني

    والحقيقة الحضانة غالية صحيح لكن بصراحة ثمنها فيها

    مش عايزة أقولكم إبني تعليمه إختلف إزاي . طبعا المدرسة كانت بريطانية الأم مصرية الأب

    وأثرت في نطق إبني وتأسيسة جامد كل ما أفتكر مز شيرين بدعلها من قلبي

    وفعلا إبني قعد سنة وتأسس جامد ماشاء الله

    سألت طبعا عن المدرسة التابعة للحضانة لقيتها مدرسة كندية ومصاريفها بجد عالية أوي

    الكي جي 1 يبتدي ب 25 الف نص المبلغ بالدولار والأخر بالمصري

    ودا كان فوق إمكانياتي بالرغم من حرصي على إستمراره في المدرسة


    بعد كده من كلامي مع الناس

    سمعت الأتي

    1-المدرسة مش حتفرق كثير علمية عادي وركزي معاه في البيت

    2- أهم شئ الجامعة محدش بيسأل كان في مدرسة إيه الناس بتسال خريج جامعة إيه

    3-كندي ايه ماله الناشونال يا بنتي فكري لو جبتي طفل تاني حتعملي ايه ساعتها

    4- كل الدكاتاترة والعباقرة مهم تعليم حكومي يعني المدارس دي هيا اللي حتخليه حاجة


    وطبعا الكلام عشان موازي لميولي وإمكانياتي حسيت إن الكلام مضبوط وإن مش حتفرق بقى المهم أدخله مدرسة معقولة وخلاص

    وفعلا قعدت أسأل لغاية ما توصلت لمدرسة رويال الدولية للغات ب 6 أكتوبر الحي الرابع

    ورحت اتفرج عليها لقيتها معقولة لكن طبعا مش بمستوى المدرسة الكندية أبدا

    ضغطت على نفسي وقلت وماله اهو اجرب

    وفعلا قدمت لإبني واتعمل ليه انترفيو وكان الإنترفيو عبيط قوي لأن كل اللي قعدوا يسألوا بودي عنه كان عنده فكره عنه وأكثر

    انا عايزة أقولكم إن ابني ماكنش بيتكلم عربي أبدا لغاية 4 سنين

    لاني انا وولده ما بنتكلمش معاه إلا بالإنجلش
    لأن العربي حيتعلمه حيتعلمه

    المهم

    اتقبل ودخلته كي جي 1

    مصاريفها كانت حوال 7 الأف في السنة والباص ب 1300 جنيه
    واللبس كلفني حوالي 700 جنيه

    مش عايزة أقولكم الفصل كانت سعته 24 طالب ودا اللي كان متفق عليه معايا

    بعد كام اسبوع بروح لفصله اتفاجي إنه بقى 27 طالب

    فرحت الإدارة وسألت تخيلوا الرد إيه ؟

    أصل المدرسة بتاعت الفصل دا هايلة وكل أولياء الأمور حبوا ينقلوا ولادهم عندها؟

    وطبعا طز في الأولاد الموجودين من الأول وطز في الخنقة والزحمة

    طبعا الفصل بقى مزدحم جدا وحتى اللوكرز مابقتش بعدد الأولاد فده يخلي الولد هوا وحظه تتحط شنطته في الأرض

    طبعا قلت لنفسي هيا دي مصر المهم مادام بيتعلم كويس استحمل

    انا مانكرش إن التعليم عندهم مش بطال هوم ورك كثير وابني اتعلم العربي عندهم بس الحقيقة
    اللمنهج بالنسبة لإبني ماكنش جديد
    لأن كل اللي اخده في المدرسة كان واخده أصلا من الأول ماعدا العربي

    ناهيكم عن الشيتات وسوء طبعها وسوء الكوالتي بتاعها
    ناهيكم عن الباص وما ادراك ما الباص

    انا شفت باصتهم مكيفة ومعقولة
    لكن الباص اللي كان بياخد إبني كان ميكروباص معفن
    وكله مدرسات

    وطبعا رحت الإدارة اعترض قالولي نعمل ايه مهو العدد كثير وإبنك في خط فيصل والهرم ومش حنقدر ننزل باصات كبيرة هناك !!!!!!!


    وطبعا مش حقولكم المدرسة قالت كده عشان فلوس الباص اندفعت خلاص وماكنتش اقدر استرجعها

    تفتكروا عملت إيه

    قلت لاحول ولا قوة إلا بالله في الكدب والخداع واتفقت مع والده نروح نودية ونجيبه والسنة الجاية مافيش باص بعد كده
    وفلوس الباص الباقية حارو ونار

    المهم

    على عدة فترات متتابعة إبني يرجع مرة صباعه اتقفل عليه الباب
    ومرة شفته وارمه ومرة مخبوط على راسه

    فأروح وأسال الاقي الحجج بقى

    اصله جري ووقع .....طب يا مس إنتي كنتي فين
    لأ مهو انا لحقته برضه ؟؟؟؟

    ولما اتخبط في شفته وجابت دم
    إتقلي إنه اتكعبل لكن إبني قاللي إن زميله ضربه

    رحت طبعا للمديرة اسألها هوا مش المفروض إن السن دا يبقى فيه متابعى أكثر من كده ومراقبة من المس والمشرفات ولا هيا هرجلة ؟

    ولا الفصل بقى زحمة فحياخدوا بالهم من مين ولا مين ؟

    المهم كل اللي اقوله وأعترض عليه بيتسمع ومافيش أي تحرك
    زي ما يقولوا كده إخبطي راسك
    حتى الإعتذار مافيش

    وتمر الأيام وزمزمية إبني تضيع ؟
    ايه يا جماعة الزمزومية فين ؟
    اصلها كانت هنا والمفروض إن إحنا بنعلمه ياخد باله من حجته المهم اطلسم الموضوع إن الولد زمزميته ضاعت

    راحت فين الله أعلم ؟

    وتمر الأيام

    وانا رايحة أخد إبني لقيته في مكان بيسموه الجيم
    بيخلوا الأولاد يقعدوا يلعبوا فيه لغاية ما أهاليهم تيجي وتاخدهم



    تابع
    quote]

    بجد انا مندهشة انتى ازاى قادرة تستحملى الوضع ده

    ده انا مدرسة بنتى ما بيحصلش فيها ربع اللى انتى بتقوليه وهتجنن وانقلها
    من الواضح ان المدرسة سيئة جدا
    طيب قوليلى قررتى تنقلى ابنك فين
    وتعرفى مدارس كويسة فى المنطقة ايه انا هنقل فى الصيف حدائق الاهرام

  10. #620
    تاريخ التسجيل
    Apr 2009
    الردود
    123
    الجنس
    امرأة
    بسم الله الرحمن الرحيم

    عزيزتي أم جوري أهلا بيكي

    انا حاليا أمامي مدرستان

    مدرسة brilliance
    ومدرسة smart village

    وربنا يكتبلي الخير محتاجة اروح أشوف المدارس على الطبيعة واتفادى سلبيات المدرسة السابقة

    وربنا كريم

    دمتي

مواضيع مشابهه

  1. الردود: 825
    اخر موضوع: 19-06-2011, 05:07 AM
  2. مدارس...مدارس...مدارس...الجزء الثالث عشر***
    بواسطة sadina في ركن الجامعات والدراسات العليا
    الردود: 2024
    اخر موضوع: 23-02-2010, 09:52 PM
  3. مدارس مدارس مدارس ..الجزء التاني
    بواسطة ام مريم 2008 في المجلس العام
    الردود: 292
    اخر موضوع: 20-02-2009, 02:07 AM

أعضاء قرؤوا هذا الموضوع: 0

There are no members to list at the moment.

الروابط المفضلة

الروابط المفضلة
لكِ | مطبخ لكِ