بسم الله الرحمن الرحيم

السلام عليكم ورحمة الله وبركاته

يا مرحبا نورت المنتدى حيّاك الله

تحيه طيبه ..

وبعد

طبيعتنا كإناث تحتّم علينا التألّق بكل شي .. صح ولا لا ؟

تحبين تكونين مرّتبة .. نظيفة .. مظهرك حلو .. و أنيق .. ومقبول ممن حولك

أمر جميل أن يكون مظهرك طيّب
و الأجمل منه أن يكون منطقك "يقوطر عسل"

حاجة مش كويسة تشوفين البنت مظهرها من أروع مايكون
وإذا تكلّمت يكون كلامها جآف .. أو سيء .. بالتالي مايكون لمظهرها قيمة تذكر

الموضوع بكل بساطة .. قاموس للألفاظ والمصطلحات الذربة والسنعة !

مثال 1 /

كنتِ جالسة ومرّت وحدة وسلمت عليك تقولين : عزّ الله مقامك
طيب لو العكس أنتِ سلمتِ على وحدة جالسة وقالت لك : عزّ الله مقامك .. كيف تردين عليها ؟

مثال 2 /

ماتقصرين - تسلمين - الله يجزاك خير - خيرك سابق - والنعم والله - الخ !

هالموضوع تجميع لكل الألفاظ سواء في المثال 1 أو المثال 2
ولا ننسى أن الكلمة الطيبة "صدقة" ..
والكلمة الطيبة بريد لقلوب الآخرين ..
معاً لأنوثة جذّابة معاً للسان يقوطر عسل

لعيون بنات خالتي انين الامه ووجوده

<والله يدومها من نعومه

مما راق لي()

::

بوركت حبيبتي

موضوع مهم

فليس لائق بالفتاة أن يمون لسانها غليظا أو جفصا

بارك الله فيك على النصيحة

وبانتظار جديدك


" يا عسولة " هههه

اهلا ام مريم
حياك ربي
الله يبارك فيك

سعدت بمرورك
كوني بالقرب



::

هههههههههههههههههههههههههههه

أحلى موضوع من أحلى أخت لأحلى نعومات خخخ

و الله موضوع خطيير
يفك أزمات ..

زي أمس وحده كانت تكلمني و انا اكحكح ..
قامت قالت لي " صحه "
انا سكت و ما عرفت وش أقول لها هع

لي عووده بإذن الله ~

زاركم ضيوف ..
أطلقي الوجه .. وتبسّمي .. وهلّي ورحبي !
وتقولين : هلا وغلا .. ياهلا والله ومسهلاً ,
يالله إنك تحييهم .. توّ مانوّر البيت .. تفضلوا تفضلوا ()

ولو كنتِ أنتِ الضيفة ..
تردين : المهلّي مايولّي ..
الله يحييك يارب .. منور بأهله .. زاد فضلك

وأثناء العزيمة جابوا البخور ..
وجاء دورك قولي :
طيّب الله فالك ..
وإن شئتِ زودي عليها : طيّب الله فالك وخلا لك أحبابك ()

حانت ساعة خروجك من العزيمة بيقولون لك : بدري !
قولي: بدري من عمرك .. والله الجلسة معكم ماتنمل .. والجايات أكثر
خلّي عنك الحتسي الماصل الي ماله سنع
( أوكي , يس , بليز , الخ )

وخلي على لسانك دايم :
سمّي, آمري , لبيه , من عيوني ..


نلقاكم في رد سنع آخر

كتبت بواسطة هتون الغيم ~

هههههههههههههههههههههههههههه

أحلى موضوع من أحلى أخت لأحلى نعومات خخخ

و الله موضوع خطيير
يفك أزمات ..

زي أمس وحده كانت تكلمني و انا اكحكح ..
قامت قالت لي " صحه "
انا سكت و ما عرفت وش أقول لها هع

لي عووده بإذن الله ~

اهلا هتونتي
الاحلى مرورك والله
اسفرت وانورت


كان قلتي لها صحة ع قلبك

بإنتظار عودتك()

مدّيتِ شي لأحد وقال لك :
- عشتِ !
تردين : عاشت أيامك

-

وحدة مبطية عنها ويوم شافتك قالت : عاش من شافك !
تردين : عاشت أيامك

-

سألك أحد عن اسمك .. وأثنى على عائلتك وقال : والنعم !
تردين بقولك : ماعليك زود ..

-

إذا مرة مرة مرة توهقتِ .. خلّي عندك هالقاعدة :
أحد دعا لك قولي : جزاك الله خير !
أحد مدحك أو أثنى عليك أو لبسك أو شكلك أو أي شي : تسلمين / الله يسلمك !

هههههه
يسلمو على الموضوع العسل
فعلا عندك حق..~
جزاك المولى كل الخير

يسلمووووووووووووو
رووووعة
والله أستفدت كتييييير
جزاك الله خير
يعني لو وحدة حطت موضوع وكاان حلو
تقولي
يسلموووووو
روووووووعة
جزاك الله خيير
ما قصرتي
صح أو لا؟
ههههههههه

والان اتت الناعمه الاولى لتتحدث

تسلمين اسومه ع الموضوع طيب الله فالك <<فاهمه الموضوع غلط

حبيبتي موضوعك في قمه الروعه <<مع اني عارفه الاشياء المذكوره اعلاه كلها واطبقها بس مو عليكم خخخخخخخ

ومن النعومه اقول لك

ربي يعطيك العافيه ع الموضوع